Пад знакам Скарыны
Два дні працягвалася Міжнародная навуковая канферэнцыя «Аксіялагічны дыяпазон мастацкай літаратуры», якая сабрала ў ВДУ імя П. М. Машэрава спецыялістаў з Беларусі, Расіі, Украіны і Малдовы. Мерапрыемства прымеркавана да Года навукі і 500-годдзя беларускага кнігадрукавання. Арганізатарамі выступілі кафедра літаратуры ВДУ імя П. М. Машэрава пры падтрымцы Інстытута літаратуразнаўства імя Янкі Купалы Цэнтра даследаванняў беларускай культуры, мовы і літаратуры НАН Беларусі. На прапанову паўдзельнічаць адгукнуліся не толькі лінгвісты, але і мастацтвазнаўцы.
Першы прарэктар Васіль Маліноўскі зачытаў прывітальны адрас рэктара ўніверсітэта Аляксея Ягорава да ўдзельнікаў мерапрыемства.
— Заканамерна, што канферэнцыя на гэтую тэму праходзіць менавіта ў ВДУ імя П. М. Машэрава. Вядома, што значны ўклад у распрацоўку каштоўнаснага падыходу да вывучэння літаратуры ўнёс адзін з самых аўтарытэтных гуманітарыяў ХХ стагоддзя Міхаіл Бахцін, які з 1920-га па 1924 год жыў у Віцебску і выкладаў у тагачасным педагагічным інстытуце, — адзначыў А. Ягораў.
Удзел у канферэнцыі прынялі 27 дактароў і 55 кандыдатаў навук. Падчас секцыйных пасяджэнняў было заслухана 124 даклады на розныя тэмы: ад прынцыпаў савецкай гендарнай палітыкі ў беларускай прозе да вобразу Францішка Скарыны ў творах пісьменнікаў. Дарэчы, імя Ф. Скарыны рэгулярна ўзгадвалася ў пытаннях і дыскусіях у кантэксце паўтысячнага юбілею выхаду першай друкаванай беларускай кнігі.
Пасля афіцыйнай часткі гасцей чакалі сяброўская вячэра і падрыхтаваныя арганізатарамі экскурсіі.