ЛЮБОЎ ДА РАДЗІМЫ — У КАНКРЭТНЫХ СПРАВАХ
Ушацкі раён на мінулым тыдні стаў месцам правядзення выязнога пасяджэння абласнога Савета дэпутатаў, на якім ішла гаворка пра грамадзянскапатрыятычнае выхаванне як аснову дзяржаўнай ідэалогіі і ролю грамадскіх фарміраванняў у гэтым працэсе.
а пачатку сустрэчы старшыня абласнога Савета дэпутатаў Уладзімір Цярэнцьеў адзначыў:
— На Ушаччыне граматна і ўзважана аддаюць належнае творчай, працоўнай спадчыне сваіх землякоў, незалежна ад іх палітычнай прыхільнасці. Пры гэтым не дапускаецца супрацьстаяння бакоў з рознымі поглядамі пры правядзенні мерапрыемстваў самага рознага накірунку.
Кіраўніцтва раёна прапанавала гасцям насычаную праграму. Члены прэзідыумаў абласнога і Ушацкага раённага Саветаў дэпутатаў, старшыні раённых і гарадскіх Саветаў дэпутатаў вобласці наведалі будоўлю фізкультурна-аздараўленчага комплексу ў райцэнтры і Арэхаўскую сярэднюю школу. Дырэктар установы адукацыі Ларыса Булаўка разам з вучнямі правяла экскурсію, расказала пра напрацоўкі педкалектыву ў розных напрамках.
Работу выязны прэзідыум працягнуў у сценах Ушацкага музея народнай славы імя Героя Савецкага Саюза У. Е. Лабанка. Тут гасцей чакаў сюрпрыз, бо спецыяльна з Мінска па запрашэнні старшыні Ушацкага раённага Савета дэпутатаў Вольгі Захарэнка прыехаў знакаміты майстар манументальнага жывапісу Уладзімір Крываблоцкі. Сваю першую значную ўзнагароду, прэмію імя Ленінскага камсамола, мастак атрымаў у сярэдзіне 1980-х менавіта за роспіс унутраных сцен ушацкага музея і з таго часу вось ужо на працягу трох дзесяцігоддзяў працягваецца яго сяброўства з установай культуры.
Удзельнікі выязнога прэзідыума наведалі мемарыяльны комплекс «Прарыў», усклалі вянок і кветкі да пліт з імёнамі загінуўшых вызваліцеляў.
Любоў да Радзімы — катэгорыя не абстрактная, вымяраецца канкрэтнымі справамі на яе карысць. Значная ўвага падчас прэзідыума надавалася аналізу дзейнасці асноўных грамадскіх аб’яднанняў Віцебшчыны. Намеснік начальніка галоўнага ўпраўлення ідэалагічнай работы, культуры і па справах моладзі аблвыканкама Пётр Гнуценка паведаміў, што на Віцебшчыне адным з першых у рэспубліцы быў створаны абласны каардынацыйны савет палітычных партый і грамадскіх аб’яднанняў для яднання іх намаганняў.
Падчас сустрэчы акрэслены задачы па ўзаемадзеянні з канструктыўнымі арганізацыямі па далейшым развіцці грамадзянскай супольнасці, адзначаны станоўчы ўклад у гэтую справу абласных і раённых аргструктур БРСМ, ветэранскай арганізацыі, Беларускага саюза ветэранаў вайны ў Афганістане, Беларускага фонду міру.
В. Захарэнка, якая з’яўляецца і намеснікам старшыні Ушацкай раённай арганізацыі РГА «Белая Русь» — адной з лепшых на Віцебшчыне, падзялілася вопытам узаемадзеяння мясцовай улады і грамадскасці. У раёне звыш 96 працэнтаў працуючых з’яўляюцца членамі прафесійных саюзаў, у членах «Белай Русі» — 14,5 працэнта, БРСМ аб’ядноўвае амаль 24 працэнты моладзі. А раённая арганізацыя Беларускага фонду міру мае лепшыя паказчыкі сярод абласных і займае ганаровае другое месца ў рэспубліцы.
Але разам з тым у асобных рэгіёнах некаторым арганізацыям не хапае ініцыятывы, новых падыходаў, форм работы. Агульныя для ўсіх грамадскіх аб’яднанняў задачы — па прыцягненні новых членаў.