«Райскія» яблычкі ад княгіні Вольгі
Выстава «Содружество» твораў майстроў народных мастацкіх рамёстваў Смаленскай і горада Вялікія Лукі Пскоўскай абласцей адкрылася ў Віцебскім абласным метадычным цэнтры народнай творчасці ў межах культурнага абмену.
Смаленскія майстрыхі прадставілі жаночыя рускія народныя касцюмы з разнастайнымі традыцыйнымі галаўнымі ўборамі — какошнікамі — і стылізаваныя сукенкі. Гэта калекцыі Алены Карпавай, Алены Ляднёвай, Ларысы Ламакінай з Ярцава. А Вольга Масквічова правяла для прысутных майстар-клас роспісу па тканіне.
Народнае дэкаратыўна-прыкладное мастацтва Вялікіх Лук прадстаўлена творамі ў розных напрамках і тэхніках выканання: гэта традыцыйныя творы, вырабленыя са скуры, лазы, бяросты, разьба і роспіс па дрэве, лапікавае шыццё, лакавая мініяцюра, фарфор і іншае.
Майстроў-суседзяў вітала дырэктар Віцебскага АМЦНТ Кацярына Лабука, якая нагадала, што гэта чарговая акцыя культурнага абмену. Летась расіяне змаглі наведаць выставу «Народная творчасць Віцебшчыны».
Святочны настрой ствараў ансамбль песні «Лада» Дома культуры «Сортировка» (Смаленск), а вялікалуцкія персанажы асілак Лука і княгіня Вольга пачаставалі ўсіх прысутных пірагамі з «райскімі», згодна з легендай, яблыкамі.
Выстава будзе адкрыта да 16 чэрвеня.