ДА КУПАЛЫ Ў ГОСЦІ
Кожны год на лецішчы беларускага песняра Янкі Купалы ў Ляўках збіраюцца госці. Сёлета 7 ліпеня споўніцца 135 год з дня нараджэння паэта. Таму раённае свята «Купала заўсёды ў сэрцы маім» ў нядзелю, 2 ліпеня, было маштабным.
Тут, у філіяле Дзяржаўнага літаратурнага музея Янкі Купалы, сустракалі гасцей з усёй краіны: намеcніка дырэктара музея В. Лебедзь, першага намесніка старшыні Саюза пісьменнікаў Беларусі А. Стэльмах, старшыню Віцебскага абласнога аддзялення СПБ Т. Краснову-Гусачэнка (на здымку), старшыню Мінскага абласнога аддзялення СПБ С. Быкаву, паэтаў Н. Гальпяровіча, І. Фралову, Д. Пятровіча і іншых прадстаўнікоў творчай інтэлігенцыі, шматлікія аршанцы, якія прыбылі на свята.
Дэлегацыю правялі паўз алею гасціннасці — тут на дэгустацыю свае прысмакі прадставілі аршанскія прадпрыемствы: малочны камбінат, хлебазавод, сырзавод, філіял «Салодкая краіна» дзяржаўнага прадпрыемства «Кандытарская фабрыка «Віцьба», «Орша-Сэрвіс», а таксама творчыя аб’яднанні ўстаноў культуры рэгіёна.
На пляцоўцы майстар-класаў госці ўбачылі творчыя набыткі майстроў аршанскага Дома рамёстваў: вялізнае пано, пашытае да 950-годдзя Оршы, даведаліся, як робіцца вышыўка і плятуцца кошыкі, а потым сталі сведкамі рыцарскага бою.
Ля помніка паэту, калi пачаўся дождж, знаўцы біяграфіі нагадалi: такое грыбное надвор’е і любіў Купала. Тут госці прагледзелі ўрывак са спектакля «І смех і грэх» народнага гарадскога тэатра.