РЭКОРДЫ НА КАСАВІЦЫ
Дванаццаты сезон у корманарыхтоўцы ў сельскагаспадарчым вытворчым кааператыве «Альгоўскае» прымае ўдзел Аляксандр Камароўскі. І кожны год на зялёным жніве ён трымае лідарства. Яго вытворчыя рэкорды адзначаны не толькі на раённым, але і абласным узроўнях. Неаднаразовы прызёр рэспубліканскіх і абласных «Дажынак», сям’я якога пераехала ў Віцебскі раён з суседняга Гарадоцкага, нягледзячы на частую ўвагу да сябе з боку журналістаў, заўжды сціпла адзначае свой уклад у палявыя работы. М еханізатар-перадавік дзеліцца асаблівасцямі корманарыхтоўкі ў гэтым сезоне: — Дажджлівае лета часам замаруджвае тэмпы, iмкнёмся максімальна задзейнічаць кожны пагодны дзень. Новая тэхніка «Ягуар» не падводзіць, травастой добры. На полі знаходжуся ўвесь светавы дзень.
Як адзначыла намеснік старшыні па ідэалагічнай рабоце і прафсаюзны лідар гаспадаркі Ірына Палякова, вынік Аляксандра — лепшы ў вобласці. Ён нарыхтаваў больш за 12 тысяч тон зялёнай масы.
— А ўвогуле трэба адзначыць працу ўсяго калектыву, задзейнічанага на палявых работах, — паведаміла Ірына Міхайлаўна. — На корманарыхтоўцы занята 20 працаўнікоў. Дапамогу прадпрыемству аказваюць людзьмі Мазалавагаз і фермерская гаспадарка Красніка. Сярод моладзі на адвозцы лепшы вынік — у Дзмітрыя Зайцава, які перавёз 2481 тону зялёнага корму. Кожны сезон годныя вынікі дэманструюць механізатары Уладзімір Астапаў, Васіль Карпешка, Юрый Дарожкін, Сяргей Бальшакоў, Сяргей Парамонаў, Міхаіл Давыдзёнак, Аляксей Юрачкін, Дзмітрый Сідарэнка і ўсе астатнія. Кожны падыходзіць да працы з імпэтам і адказнасцю.
На прадпрыемстве на высокім узроўні наладжана прафесійнае спаборніцтва. Кожны дзень абнаўляюцца зводкі, інфармацыя даносіцца да працаўнікоў. Двухразовае харчаванне дастаўляецца ў поле.