Пяць прычын прыехаць у Гарадок
Райцэнтр можна смела назваць моладзевым горадам, бо тут ёсць каледж. Акрамя таго, запомніцца вам горад сваімі ўздымамі і спускамі — для неспрактыкаванага турыста могуць узнікнуць цяжкасці. Асабліва гэта адчуваецца каля маста праз Гаражанку. Тут, з аднаго з узвышэнняў, адкрываецца прыгожы від на Гарадок з драўлянымі хатамі. Райцэнтр значна абнавіўся пасля абласных «Дажынак», і праца тых людзей не прайшла дарэмна. Акуратны і ўтульны, ён прыцягвае, сюды заўсёды прыемна завітаць, бо горад з такой лагоднай і мяккай назвай не можа расчараваць.
Прычына першая. Лыжаролерная траса
Аб’ект мае працягласць 7,5 кіламетра. Праз клімат снег тут ляжыць часам і да канца вясны. Траса з рознай цяжкасцю пад’ёмаў і спускаў з’яўляецца базай для падрыхтоўкі моладзевых зборных па зімовых відах спорту. Побач ёсць гатэль, фізкультурна-аздараўленчы комплекс з трэнажорным і гульнявымі заламі. Працуе тут і пракат спортінвентару для жадаючых праехацца па трасе.
Прычына другая. Раённы краязнаўчы музей
У ім дзейнічаюць тры экспазіцыйныя і выставачныя залы. Аддзел прыроды змяшчае палеанталагічныя экспанаты, фотаздымкі, карты-схемы прыроднага асяроддзя Гарадоччыны, разнастайныя дыярамы.
Пастаянная экспазіцыя пад назвай «Зала этнаграфіі і народных рамёстваў Гарадоччыны» складаецца з чатырох раздзелаў пра жыццё і быт нашых продкаў. У залах другога паверха праводзяцца выставы. Увогуле,
Прычына трэцяя. Радзіма творцы
«Ці знаў хто з вас, браткі, Тараса, што палясоўшчыкам служыў?» — так бадзёра пачынаецца знакавы для беларускай літаратуры твор. З упэўненасцю можна сказаць, што жыхары Гарадка пра аўтара гэтай паэмы Канстанціна Вераніцына ведаюць і шануюць яго памяць. У райцэнтры каля будынка музея знаходзіцца літаратурна-мастацкая кампазіцыя, камяні з мемарыяльнымі знакамі ў гонар вядомай паэмы «Тарас на Парнасе».
Вераніцын адыграў важную ролю ў станаўленні новай беларускай літаратуры. У Гарадку амаль дзесяць гадоў праводзіцца адмысловае свята народнай творчасці, беларускай паэзіі і фальклору «Гарадоцкі Парнас».
Прычына чацвёртая. «Пахаванне дзеда»
Яшчэ Гарадоччына вядома ўнікальным абрадам «Пахаванне дзеда». Гэта народная пародыя на традыцыйныя галашэнні, ёю святкуецца і вітаецца прыход вясны.
Прычына пятая. Старыя будынкі
Каля галоўнай плошчы райцэнтра захавалася забудова канца XIX — пачатку XX стагоддзяў. Дом адзін з самых старых у горадзе, зараз тут размяшчаецца аптэка. Ёсць у межах горада і будынак былога вадзянога млына, пабудаванага прыкладна ў той жа перыяд. Трэцяе збудаванне — былая паштовая станцыя. Яна, акуратная і прыгожая, займела новае жыццё дзякуючы праваслаўнай царкве. Будынак адрамантавалі, цяпер тут ідуць службы.