«Па-глыбоцку дзіўна-спеўна адкружыў вішнёвы баль»
«Вішнёвы фестываль-2017» адзначыў сваю першую круглую дату — 5-годдзе з дня заснавання. Саліднасці яму, маладому ўзростам, надаў прысвоены сёлета статус міжнароднага
Свята ў гэтым годзе праходзіла пры фінансавай падтрымцы Міністэрства культуры Рэспублікі Беларусь, Віцебскага аблвыканкама і Глыбоцкага райвыканкама. Шматлікія госці з блізкага і далёкага замежжа, якія прыехалі ў Глыбокае, сваёй прысутнасцю пацвердзілі папулярнасць фестывалю, яго значнасць і маштаб. Падарункам для глыбачан і ўдзельнікаў святочнай дзеі стала сонечнае цёплае надвор’е, якога так усе чакалі. Так што разам з «Вішнёвым фестывалем» у Глыбокае прыйшло лета з каляровымі фарбамі, спелымі ягадамі і добрым настроем.
Асноўны, суботні, дзень фестывалю быў да краёў напоўнены мерапрыемствамі, адметнымі, арыгінальнымі і запамінальнымі. Пачалася святочная дзея ля скульптурнай кампазіцыі «Глыбоцкая вішня». Сюды на карэце прыехала гаспадыня фестывалю — Вішнёвая Каралева. Яна прывітала прысутных і гасцей горада і запрасіла ўсіх на святочнае шэсце. Пад барабанны дробат барабаншчыц узорнага ансамбля «Віват» пачалося афіцыйнае адкрыццё дэкаратыўна-мастацкай кампазіцыі «Дружба народаў» на Цэнтральнай плошчы.
— У першы год правядзення «Вішнёвага фестывалю» мы заклалі вішнёвы сад, на пяты год разам з замежнымі гасцямі пасадзілі дубраву, напярэдадні свята ўстанавілі вось гэтую кампазіцыю і тым самым даказалі, што мы, глыбачане,— людзі працавітыя, думаем пра будучыню і жадаем, каб на нашай зямлі былi мір, спакой і дабрабыт,— гаварыў у сваім выступленні старшыня райвыканкама Алег Морхат.— Адзін з галоўных элементаў кампазіцыі — зямны шар, наша планета, заўтрашні дзень якой залежыць ад прадстаўнікоў усіх нацый і народаў і ад іх добрасуседства і міралюбнасці. Гадзіннік паказвае час, кожную хвіліну якога мы павінны траціць на тое, каб працаваць дзеля дабрабыту сваёй бацькаўшчыны, усталёўваць суседскія кантакты і ўзводзіць масты супрацоўніцтва. На даху канструкцыі — флюгер з добрым анёлам-ахоўнікам. У які бок паварочваецца флюгер, туды мы, глыбачане, пасылаем свае добрыя намеры і прывітанні, адтуль мы рады сустракаць нашых гасцей… Калі гаварыць пра вішню, то ў яе кветачках — пяць пялёсткаў, якраз столькі, колькі на зямным шары мацерыкоў. Няхай да нас з’язджаюцца госці адусюль: мы для ўсіх знойдзем шчырыя словы прывітання, хлеб-соль паднясём, песняй настрой уздымем і знойдзем агульную мову — мову ўзаемаразумення і міру.
Белыя галубкі, якіх выпусцілі ў знак сяброўскай згоды і чысціні сяброўскіх адносін, падняліся ў нябесны блакіт, дзе купалася залацістае сонца… З атым мерапрыемства перамясцілася на галоўную сцэну. На яе па чарзе ўзыходзілі беларускія і замежныя калектывы, што прыехалі на свята: ансамбль народнай песні «Атрада» цэнтра традыцыйнай культуры і творчасці з Гарадка, фальклорны танцавальны ансамбль «Эрэбуні» і «АрырАнг» рэспубліканскіх цэнтраў нацыянальных культур Арменіі і Паўднёвай Карэі, дзіцячы хор «ВіланЭла» кансерваторыі
горада Кір’ят-Бялік (Ізраіль), ансамбль «Аколіца» Дагдскага беларускага грамадства «Вербіца» (Латвія), капэла народнай музыкі Швенчонскага краю (Літва), Казьлярская капэла музычнай школы горада Збоншынь (Польшча), народны ансамбль рускай песні «Узор’е» са Шлісельбурга і народны хор «Крыніцы» з Лукаянаў (Расійская Федэрацыя), ансамбль танца «Сударушкі» (Эстонія).
На свяце прысутнічалi афіцыйныя дэлегацыі з Германіі, Францыі, Польшчы, Ізраіля, Латвіі, Літвы, Грузіі, Расіі, прадстаўнікі дыпламатычнага корпуса Турэцкай, Славацкай, Азербайджанскай, Украінскай рэспублік, Расійскай Федэрацыі, а таксама ветэраны Вялікай Айчыннай вайны, ганаровыя грамадзяне Глыбоцкага раёна, прадстаўнікі раёнаў Віцебскай вобласці і краіны.
У ліку ганаровых гасцей свята былі старшыня Камітэта дзяржкантролю Рэспублікі Беларусь Леанід Анфімаў, намеснік міністра культуры краіны Васіль Чэрнік, член Савета Рэспублікі Нацыянальнага сходу Рэспублікі Беларусь Мікалай Мартынаў, старшыня райвыканкама Алег Морхат, старшыня райсавета дэпутатаў Галіна Унуковіч, начальнік галоўнага ўпраўлення ідэалагічнай работы, культуры і па справах моладзі Віцебскага аблвыканкама Генадзь Ягораў.
Вядучы зачытаў прывітальны адрас, які даслаў з нагоды свята Старшыня Палаты прадстаўнікоў Нацыянальнага сходу Рэспублікі Беларусь Уладзімір Андрэйчанка, а Васіль Чэрнік — віншаванні глыбачанам і ўдзельнікам фестывалю ад міністра культуры Барыса Святлова. — Фестываль праходзіць у чыстым, дагледжаным, прыгожым горадзе, і гэта заслуга кожнага глыбачаніна. Дзякуй вам, паважаныя землякі, за старанную плённую працу. «Вішнёваму фестывалю» — быць! Шырокі бальшак нашаму вішнёваму святу! — адзначыў у выступленні Алег Морхат. П ад дружныя апладысменты Васіль Чэрнік уручыў Алегу Віктаравічу Ганаровую грамату Міністэрства культуры Рэспублікі Беларусь «За асабісты ўклад у развіццё і падтрымку сферы культуры». Затым цырымонію ўзнагароджання праводзіў Алег Морхат. Падзякамі старшыні райвыканкама былі адзначаны мастак Эдуард Мацюшонак, Глыбоцкая цэнтралізаваная клубная сістэма (дырэктар Алена Заяц), Глыбоцкая дзіцячая школа мастацтваў (дырэктар Мікалай Лашкоў), Глыбоцкая цэнтральная бібліятэчная сістэма (дырэктар Валянціна Спасібёнак), начальнік групы цэнтралізаванага гаспадарчага абслугоўвання аддзела ідэалагічнай работы, культуры і па справах моладзі Віктар Казлоўскі, дырэктар ПВГП «У Ажуры» Юрый Татарыновіч, Ганаровай граматай раённага Савета дэпутатаў узнагароджаны Глыбоцкі гісторыка-этнаграфічны музей (дырэктар Алена Мядзелец) «За значны ўклад у развіццё, захаванне і папулярызацыю гісторыка-культурнай спадчыны», якую ўручыла Галіна Унуковіч. П асля афіцыйнай цырымоніі пачалася канцэртная праграма з элементамі тэатралізацыі, з удзелам Вішнёвай Каралевы, барона Мюнхгаўзена, дзетак-вішанек, салістаў глыбоцкай студыі «Архіў» Паўла Пеляёнка, Юліі Сцежкінай, Кацярыны Закрэўскай, членаў дзіцячай студыі «Голдэн смайл», творчых замежных калектываў.
А ў гэты час гасцінна запрашалі вішнёвыя падвор’і, арганізаваныя сельсаветамі і прадпрыемствамі раёна. Чаго там толькі не было?! Утульныя дворыкі, імправізаваныя альтанкі, упрыгожаныя кветкамі арэлі — іх даволі хутка аблюбавалі для фотасесій глыбачане і госці фестывалю. У кожным падвор’і было і ўежна, і спеўна. Вакальныя фальклорныя групы і салісты падрыхтавалі музычныя праграмы, гульні, бяспройгрышную латарэю. Сталы ламаліся ад прысмакаў і пачастункаў. Хапала на свяце забаў і для дзяцей: яны маглі пастраляць у ціры, пакатацца на каруселях і дзіцячых машынках, дастаць выйгрыш, ускарабкаўшыся па вісячай лесвіцы, купіць любімую цацку.
А яшчэ дарослыя і дзеці прымалі ўдзел у дабрачыннай акцыі «Выратавальная вішанька». Праходзіла яна на працягу чатырох дзён фестывалю. Арганізавалі яе актывісты раённай арганізацыі РГА «Белая Русь», члены выратавальнага атрада «Ангел» горада Глыбокае, які ўзначальвае Юлія Міцкевіч, і сябры «Садружнасці праваслаўнай моладзі ў імя прападобнага Серафіма Сароўскага Глыбоцкага благачынія».
— Дзякуючы міласэрным людзям, нераўнадушным да чужога болю, было сабрана 2 тысячы 191 беларускі рубель 45 капеек і 204 расійскія рублі. Гэтыя грошы мы перадалі бацькам хворага глыбачаніна Рамана Куніцкага, якому патрэбна выратавальная аперацыя,— сказала Людміла Чэбан.
Любімыя песні глыбачан прагучалі ў праграме «Вішнёвая карусель». Затым загадчыца Глыбоцкага аддзела загс Таццяна Баранава правяла ўрачыстую цырымонію заключэння шлюбу. Мужам і жонкай у прысутнасці дзясяткаў гасцей фестывалю сталі Дзіяна Казачок і Міхаіл Фядотаў. Таццяна Леанідаўна павіншавала залатых юбіляраў, Пятра Іванавіча і Людмілу Баляславаўну Мяжэніных, якiя пражылі ў каханні і згодзе паўсотні гадоў.
Конкурс гарманістаў «Вішнёвыя найгрышы», дэфіле ўдзельніц конкурсу прыгажосці «Міс Экстрым», гала-канцэрт «Вішнёвае суквецце сяброўства», канцэртная праграма «Вішнёвая нота-2017»— усе гэтыя мерапрыемствы, без сумневу, парадавалі глыбачан і гасцей свята, якія з’ехаліся з усіх абласцей краіны і з замежжа. Фінальным акордам стала ўрачыстая цырымонія закрыцця фестывалю, аўкцыён «Вішнёвы пірог» і яркі салют.