ЧЫМ БАГАТЫ, ТЫМ I РАДЫ

Госці экалагічнага свята «Жураўлі і журавіны Міёрскага краю», што праходзіць з 8 па 17 верасня, пабачылі мноства дзівосаў на падворках мясцовых сельскіх Cаветаў

У рамках свята адбыліся сустрэчы дзелавых ініцыятыў з моладдзю і прадстаўнікамі малога і сярэдняга бізнесу, цікавыя экалагічныя экскурсіі, прайшоў конкурс на лепшага збіральніка журавін і іншыя мерапрыемствы.

Самабытнасці і вясковага каларыту журавінаваму марафону дадалі сельскія падворкі. На кожным гасцінна, весела, цікава. «Жураўліны кірмаш-2017» быў багатым, шчодрым і з сюрпрызамі.

Фішкай Узмёнскага падворка лічыцца мёд. Карысны натурпрадукт штогод прывозяць на свята. Гаспадар мядовага куточка — Андрэй Сцепулёнак. Даглядае пчальнікі ў ААТ «Узмёнскі край» і мае сваіх пчол.

— Да балота ад Узмён далекавата, таму прадстаўляем мёд. Аднак журавіны таксама ёсць, у складзе фестывальных страў,— расказвае старшыня сельсавета Таццяна Смулько.— Рыхтавацца пачыналі за месяц. Усё, што госці ўбачылі, пачулі і паспрабавалі на падворку, — клопат работнікаў культуры, школы, сельскіх старэйшын і актывістаў. Кіраўнікі гаспадарак «Узмёнскі край» (Ігар Брынкевіч) і «Гвардзейскі» (Міхаіл Іваноў) нас падтрымліваюць матэрыяльна. Духмянае дапаўненне да мёду — выпечка. Пячэ пірагі старэйшына вёскі Даўгінава Тамара Шчарбакова. Пячэнне-пялёсткі — дэсерт ад Алены Красько са Слабады, рулет з журавінамі — ад повара з Узмёнскай школы Таццяны Протас. Старэйшына Лявонпаля Марыя Шук прыгатавала сыр з малака ад сваіх козачак.

Генеральную рэпетыцыю да свята ў Завуццеўскім сельсавеце правялі 11 верасня, а рыхтавацца да паездкі на паўвостраў пачалі яшчэ ў пачатку жніўня.

— На нашай тэрыторыі знаходзіцца балота Жада — заказнік рэспубліканскага значэння. Таму ў дэкоры падворка і на стале зрабілі акцэнт на журавах, журавінах, дарах прыроды,— гаворыць старшыня сельсавета Яўгеній Баран. — Частуем журавінавым морсам і выпечкай, яблыкамі, грушамі і іншымі натуральнымі прадуктамі з лесу, саду і агарода. У куточку прыроды пасяліўся журавель з чароту.

Візітку прадумалі ў Папшулёўскім клубе і Цвецінскім СДК на чале з кіраўнікамі Наталляй Баслак і Зінаідай Кадушка. Ручнікі і іншыя рукатворныя рэчы для ўпрыгожвання падворка збіралі бібліятэкары Яўгенія Фурс з Завуцця, Вольга Хрол з Папшулёў, Ксенія Красько з Цвеціна. Пра фестывальны стол паклапаціліся старэйшыны Ія Яленская і Віктар Філіповіч.

— Кожны год гасцям фестывалю хочацца бачыць на сельскіх падворках штосьці новае і цікавае. Мы рыхтаваліся за месяц і, спадзяёмся, апраўдалі чаканні,— заўважае старшыня Міёрскага сельсавета Галіна Шынкевіч.— Прадстаўляем вырабы нашых умельцаў, экалагічныя экспазіцыі. Традыцыйныя пачастункі — журавінавыя кісель і морс, журавіны ў цукровай пудры. Сёлета гаспадары падворка прыгатавалі выпечку па новых рэцэптах. Прапануюць чай, завараны на лугавых травах. Кулінарную гасцёўню прадставiлi юныя паварчукі з Дворнасельскай школы. Вучні і настаўнікі зрабілі балотную экспазіцыю і паспрабавалі сябе ў карвінгу (разьбе па агародніне і садавіне).

У Пераброддзі далучыліся да фестывалю старэйшыны ўсіх вёсак. Кожны населены пункт прадстаўляе свой святочны каравай. Гасцей частавалі прыгатаванай на кастры поліўкай.

— Перабродскі край раней прадстаўлялі як турыстычны. Сёлета замест птушыных пудзіл і скур жывёлы — хлеб. Гэта сімвал дабрабыту і гасціннасці нашых людзей,— расказвае старшыня сельсавета Віктар Дзеравянчык.— Да фестывалю рыхтуемся за месяц. Ідэйны цэнтр — сельсавет і сельскія клубы, мясцовы актыў. На падворку прадстаўлена экспазіцыя дзіцячых вырабаў. Усе разам робім падворак гасцінным, цікавым і кожны раз новым.

Шырокім асартыментам пачастункаў здзівіў Павяцкі сельсавет. Старэйшына Павяцця Марыя Юрашэк і культработнік Эдзіта Філіпава прыгатавалі стравы па новых рэцэптах. Журавіны выкарысталі і як інгрэдыент, і ў якасці дэкору. Загадчык Паташнянскага клуба Валерый Блажэвіч насмажыў шашлыкоў. Весялілі гасцей Аляксандр Гайдзель і Антон Астукевіч у ролі сватоў.

— Наш сельсавет у конкурсе сельскіх падворкаў пастаянна ў тройцы лідараў,— заўважае старшыня Луцыя Гардзель.— Высокую планку трымаем дзякуючы старанням устаноў культуры, школы і мясцовых гаспадарак. Здаваць пазіцыі — не ў нашых планах.

На Язненскім падворку можна было сфатаграфавацца з крынічкай Святога Яна і талеркавым каменем.

— Ідэі, як прадставіць Язненшчыну на фестывалі

«Жураўлі і журавіны», разглядаем на працягу года. Да рэалізацыі прыступаем за некалькі тыдняў. Нашы надзейныя памочнікі — установы культуры, язненскае лясніцтва, якім кіруе Андрэй Шчарбіцкі, дзіцячы садок на чале з Ірынай Балай, школа, прадпрыемствы «Юбілейны» і «Язна», — гаворыць старшыня сельсавета Валянціна Фядзьковіч.— Сёлета паказваем сем цудаў Язненскага краю. Гэта не толькі прыродныя дзівосы. Напрыклад, калектыў «Язынка», якому споўнілася трыццаць год, фестываль «Язненскі благавест». Тэрыторыю падворка язненцы агарадзілі драўляным плотам, які зрабіў прадпрымальнік Аляксандр Каваленка. Таксама яго рук справа — падстаўка для выставы сельгаспрадукцыі.

На падворку Новапагосцкага сельсавета — россып журавін і рукадзельных вырабаў. Работы народных умельцаў прадстаўляюць Наўгародскі і Чапукоўскі сельскія дамы культуры. Сувеніры прапануюць майстрыхi Тэрэза Корсак і Алена Дулінская з Чапукоў. Школьнікі падрыхтавалі выставу «Дары восені».

Работы выхаванцаў Сіцькоўскай школы размясцiлiся на падворку Мікалаёўскага сельсавета. Яго аздобiлi саматканыя дыванкі, кулінарныя знаходкі і ўпрыгожаны масцікай торт ад настаўніцы Яўгеніі Мазяньковай. Яе калега Марыя Арцімёнак з дырэктарам Мікалаёўскага клуба Ігарам Мятлой адказныя за культурную праграму.