ГОНАР І ПАВАГА ГЕРОЯМ ЖНIВА
Самы сур’ёзны іспыт — уборачную кампанію — аграрыі Аршаншчыны вытрымалі на выдатна. Намалот у раёне сёлета склаў 147280 тон зерня пры ўраджайнасці 45,2 цэнтнера з гектара
Здавалася б, зусім нядаўна на палях каласілася збожжа і ў промнях сонца пералівалася золатам, а ўжо сёння засекі да краёў запоўнены новым ураджаем. Хлебаробы Аршанскага раёна ў чарговы раз даказалі: на гэтай зямлі працуюць сапраўдныя прафесіяналы.
Сёлетняе жніво вызначыла 82 тысячнікi, адзін зернеўборачны экіпаж упершыню ў раёне і вобласці перавысіў намалот звыш чатырох тысяч тон зерня. Усе гэтыя лічбы сведчаць аб тым, што падчас уборкі ўраджаю разгарнулася гарачае спаборніцтва. Саступаць лідзіруючыя пазіцыі ніхто не хацеў. Убраць збожжа да апошняга гектара, да апошняга зярнятка — такім быў дэвіз тых, хто ўпарта крочыў да пераможнага фінішу.
Літаральна з першых дзён уборачнай кампаніі сапраўднымі героямі хлебнай нівы сталі камбайнеры сельскагаспадарчага філіяла «СГЦ «Задняпроўскі» ААТ «Аршанскі КХП» Сяргей Грэкаў і яго памочнік Алег Сушкевіч. Яны першымі ў раёне перасягнулі тысячны рубеж па намалоце зерня, а сярод лідараў жніва сталі дэбютантамі. Для Сяргея Грэкава, які шчыруе на хлебнай ніве амаль тры дзясяткі гадоў, гэты сезон стаў асабліва знакавым у працоўнай біяграфіі. Старшыня Віцебскага абласнога выканаўчага камітэта Мікалай Шарснёў уручыў ключы ад новага высокаэфектыўнага камбайна Lexion-770. На ім экіпаж камбайнераў намалаціў яшчэ больш за тры тысячы тон зерня. За высокія паказчыкі на жніве Сяргей Грэкаў і Алег Сушкевіч — у ліку пераможцаў на абласных «Дажынках».
Калі хлебаробаў з філіяла «СГЦ «Задняпроўскі» ААТ «Аршанскі КХП» можна лічыць лідарамі-дэбютантамі, то вось Мікалай Захарэнка і Сяргей Каткоўскі з сельскагаспадарчага вытворчага кааператыва «Ларынаўка» на працягу многіх гадоў запар толькі замацоўваюць свае поспехі. Рэкордаў на іх рахунку шмат, сёлета яны таксама сярод перадавікоў жніва, і на галоўнай пляцоўцы фестывалю-кірмашу працаўнікоў вёскі ў Дуброўне Мікалай і Сяргей у чарговы раз атрымаюць заслужаную ўзнагароду.
Увогуле, на «Дажынках» дэлегацыя з Аршанскага раёна самая шматлікая. Напрыклад, пераможцамі абласнога спаборніцтва за дасягненне лепшых вынікаў ва ўборцы ўраджаю зерневых і зернебабовых культур, рапсу ў намінацыі «Сярод інтэграцыйных структур на ўборцы зерневых і зернебабовых культур» прызнана Аршанская інтэграцыйная структура, а сярод сельскагаспадарчых арганізацый, якія не ўваходзяць у інтэграцыйныя структуры ў першай групе, — першае месца ў сельскагаспадарчага вытворчага кааператыва «Ларынаўка». Раён прызнаны лепшым у вобласці па ўборцы рапсу. Сярод сельскагаспадарчых арганізацый, якія не ўваходзяць у інтэграцыйныя структуры, па ўборцы рапсу першае месца заняло адкрытае акцыянернае таварыства «Агракамбінат «Юбілейны». Сярод старшых аператараў зернесушыльных установак перамогу святкуе таксама прадстаўнік «Юбілейнага» — Аляксей Яшчанка.
На «Дажынках» будуць адзначаны i галоўныя аграномы, галоўныя інжынеры з «Ларынаўкі» Аляксандр Каплун і Віктар Сямашка, агракамбіната «Юбілейны» — Яўген Вацура і Максім Бубеншчыкаў.
Унушальны спіс пераможцаў-аршанцаў у намінацыях «Сярод старшых камбайнераў і камбайнераў сельскагаспадарчых арганізацый» і «Сярод старшых камбайнераў і камбайнераў маладзёжных экіпажаў ва ўзросце да 31 года». Так, героямі жніва сталі: Дзмітрый Новікаў (ААТ «Агракамбінат «Юбілейны»), Сяргей Спаткай, Дзмітрый Бацюкоў, Алег Кісялёў, Вадзім Крупянчук, Уладзімір Анікееў, Андрэй Петрашкевіч — прадстаўнікі рэспубліканскага вытворчага ўнітарнага прадпрыемства «Вусце» НАН Беларусі», Сяргей Дамброўскі з ААТ «Задроў’е», Дзмітрый Захарэнка з філіяла «Птушкафабрыка Аршанская» адкрытага акцыянернага таварыства «Аршанскі камбінат хлебапрадуктаў», Максім Сярноў (ААТ «Агракамбінат «Юбілейны»).
Як заўсёды, імёны герояў жніва Аршаншчыны прагучаць на галоўнай сцэнічнай пляцоўцы абласных «Дажынак», а мы, землякі, вельмi ганарымся тымі, хто сваёй пачэснай працай на зямлі праслаўляе наш край.