Любоў да сваёй справы

Для старшага камбайнера ААТ «Задроўе» Аршанскага раёна Сяргея Дамброўскага сёлетні сезон на жніве — дзявяты

Чацвёрты раз Сяргей стаў лідарам уборачнай кампаніі сярод моладзевых збожжаўборачных экіпажаў, таму зноў будзе прадстаўляць Аршанскі рэгіён на абласным свяце ўраджаю «Дажынкі».

На сельскагаспадарчым прадпрыемстве «Задроўе» можна пачуць шмат добрых слоў у адрас руплiвага хлебароба, які выдатна спраўляецца з ўсёй даручанай яму работай, беражліва адносіцца да тэхнікі.

Сяргей Дамброўскі — мясцовы жыхар, з вёскі Задроўе. Пасля заканчэння ліцэя машынабудавання адразу прыйшоў у родную гаспадарку. Працуе вадзіцелем, але кожны год падчас жніва дапамагае ва ўборцы зерневых і іншых культур. Спачатку быў памочнікам камбайнера, прыглядаўся да ўсяго, што і як рабіць, а праз два гады і сам сеў за штурвал. Так і шчыруе старшым камбайнерам на хлебнай ніве ўжо сёмы год.

Сёлета на камбайне КЗС-10К-21 намалаціў 1261 тону зерня. Вынік мог быць і большы, але крыху падвяла тэхніка. Сяргей ведае, што ўбіраць хлеб — справа пачэсная, але вельмі няпростая, таму складанасцей не баіцца. Зараз старшы камбайнер задзейнічаны на ўборцы канюшыны.

У «Задроўі» ў свой час працаваў бацька Сяргея Аляксандр Мікалаевіч. Удзельнічаў ва ўборачнай кампаніі і яго старэйшы брат Аляксей. У мінулым годзе браты Дамброўскія працавалі ў пары і дасягнулі добрых вынікаў.

Чарговы поспех хлебароба Сяргея Дамброўскага — пацвярджэнне яго прафесіяналізму і любові да хлебнай справы.