Падмурак — трывалы
ТУ тым, што філіял «Гараны-Агра» Полацкага камбіната хлебапрадуктаў стаў адным з пераможцаў абласнога спаборніцтва па вытворчасці збожжа, вялікая заслуга экіпажа камбайнераў у складзе Сяргея Гарбаценкі і Ігара Данілкіна. акога працоўнага поспеху на жніве ў Полацкім раёне не памятаюць нават старажылы. Сёлетняя ўборачная ўвойдзе ў гісторыю значнай падзеяй: адзін з лепшых экіпажаў філіяла «Гараны-Агра» ў складзе камбайнера Сяргея Гарбаценкі і памочніка Ігара Данілкіна ўпершыню намалаціў больш за дзве тысячы тон збожжа, рапсу і траў.
На сёлетняй уборачнай камбайнеры-пераможцы раённага спаборніцтва працавалі на новым камбайне New Holland. Тэхніка не падводзіла, і пакуль было добрае надвор’е, нястомныя хлебаробы паспелі намалаціць спачатку першую тысячу тон збожжа, а потым і другую. Віншавалі з двухтысячным намалотам Сяргея Гарбаценку (на здымку) старшыня Полацкага райкама прафсаюза работнікаў аграпрамысловага комплексу Аляксандр Дабраслаўскі, старшыня прафкама філіяла Галіна Кароўчанка. Ён, сціплы па натуры чалавек, прымаў віншаванні стрымана, бо прывык адказна працаваць з ранку да вечара, і ўсе працоўныя поспехі для яго заканамерныя.
— Камбайн не падводзіў. Убіралі азімую і яравую пшаніцу, жыта, рапс. Самую высокую ўраджайнасць дала азімая пшаніца: 50—78 цэнтнераў з гектара. У параўнанні з мінулым годам гэта значна больш. Новы камбайн — не проста ўборачная тэхніка, а цуд, працаваць зручна — адно задавальненне! Захоп жаткі ў два разы перавышае магчымасці старых камбайнаў,— зазначыў двухтысячнік і падкрэсліў, што працоўны поспех ён раздзяляе са сваім надзейным памочнікам Ігарам Данілкіным.
Вядома ж, немалаважная і высокая ўраджайнасць культур, а гэта ўжо вынік работы агранамічнай службы. Ды і было дзе «разгуляцца» новаму камбайну: у філіяле пад збожжавыя аддаюць вялікія плошчы. У дадатак да гэтага — спрыяльны мікраклімат у калектыве, добры настрой працуючых, выдатнае гарачае харчаванне. Таму і змагла гаспадарка выйсці ў абласныя пераможцы.