ПЕРАМОЖЦЫ Ў ПЯТЫ РАЗ

Сямейныя экіпажы на палетках Сенненшчыны — заканамернасць, прадыктаваная жыццём. Прозвішчы Гарбачоў і Гарнак — самыя распаўсюджаныя

Два экіпажы зернеўборачных камбайнаў філіяла «Віцебская доследная меліярацыйная станцыя Iнстытута мелiярацыi» РНУП «Інстытут меліярацыі» Сенненскага раёна ў чарговы раз сталі пераможцамі абласнога спаборніцтва на жніве: Барыс Гарнак і Віктар Гарнак — сярод моладзі, Аляксей Гарбачоў і Уладзімір Васілёнак — сярод экіпажаў камбайнаў маркі КЗС-10К «Палессе». На іх рахунку адпаведна намалот у 1751,43 і 1923,25 тоны збожжа.

І яшчэ адно невялікае, але важнае ўдакладненне, якое дазваляе больш аб’ектыўна ацаніць дасягненне. Поспех да сенненскіх камбайнераў прыйшоў з выкарыстаннем машын, што эксплуатуюцца больш за дзесяць сезонаў.

А ўпершыню хлебаробы Віцебскай доследнай меліярацыйнай станцыi заявілі пра сябе ў 2013 годзе. Тады на рэспубліканскім фестывалі-кірмашы пра- цаўнікоў вёскі «Дажынкі», што праходзіў у Горках Магілёўскай вобласці, Аляксей Гарбачоў быў уганараваны за трэцяе месца сярод моладзевых экіпажаў. Пачынаючы з 2014 года на абласны п’едэстал гонару ўздымаліся па два лепшыя экіпажы сельгасарганізацыі.

У калектыве Віцебскай доследнай меліярацыйнай станцыі працуе ўсяго 30 чалавек. Прозвішчы Гарбачоў і Гарнак — самыя распаўсюджаныя.

— Большасць з іх — члены адной сям’і,— расказвае Валерый Кучко, дырэктар сельгасарганізацыі,— а галава яе, Аляксандр Гарбачоў, — галоўны сеяльшчык зерневых культур, рапсу, бабовых траў. Штогод ён з дапамогай пасяўнога агрэгата «Лемкен» засявае каля 400 гектараў. Аляксей Гарбачоў — яго сын, Барыс Гарнак — зяць. Так што, можна сказаць, старэйшы Гарбачоў закладвае аснову для іх поспеху.

У сям’і Аляксандра Гарбачова вырасла сямёра дзяцей: чацвёра сыноў і тры дачкі. Амаль усе яны працуюць на Віцебскай доследнай меліярацыйнай станцыі. Так што поспех, рэкордныя намалоты, а сёлета ў арганізацыі сабралі на круг па 52,3 цэнтнера зерневых і 30,5 цэнтнера рапсу, дасягненні экіпажаў зернеўборачных камбайнаў — гэта вынік працы ўсяго калектыву. І не так важна, якія прозвішчы людзі носяць, якую работу выконваюць. Для хлебаробаў выраз «родная зямля» не проста гук. Яны нарадзіліся тут, працуюць на зямлі і спадзяюцца, што іх справу працягнуць новыя пакаленні Гарбачовых і Гарнакоў.