НЕ МАРНАВАЛI ЧАС, А ШЧЫРАВАЛI НА ПАЛЯХ
Сёлетні год быў спрыяльным для земляробаў Лепельшчыны. Усе сельгасарганізацыі своечасова разлічыліся з дзяржаўным заказам
Зерневымі культурамі ў раёне было занята 9,5 тысячы гектараў. Надвор’е ўнесла істотныя карэктывы, ссунуўшы на тэрмін ад тыдня да паўмесяца ўсе тэхналагічныя тэрміны, пачынаючы ад сяўбы i заканчваючы ўборкай. З іншага боку, тыя, хто не марнаваў часу, стараўся выкарыстаць кожную пагодлівую хвіліну, жніво сустрэлі ў поўнай гатоўнасці.
Аднымі з першых на палеткі выехалі камбайнеры гаспадарак «Лепельскае» і «Чарэйшчына». Самыя вялікія плошчы пад уборку ўжо каторы год мае сельскагаспадарчы вытворчы філіял «Заазер’е», больш за 2,4 тысячы гектараў. З нядаўняга часу гаспадарка ўвайшла ў інтэграваную структуру адкрытага акцыянернага таварыства «Віцебскі мясакамбінат», што дазволіла набыць каля 30 адзінак плугоў, культыватараў, прычэпаў і іншага вытворчага абсталявання.
Акрамя іншага, інтэграваная структура прыдбала тры зернеўборачныя камбайны New Holland, адзін з якіх амаль усю ўборачную кампанію адпраца- ваў на палетках «Заазер’я». Камбайнерам на ім быў Леанід Парамонаў, памочнікам — Дзмітрый Скрыпялёў, прыкамандзіраваныя з Віцебска. Мужчыны выдатна папрацавалі, першымі ў раёне і вобласці перасягнулi рубеж у тысячу, а потым —і ў дзве, і ў тры тысячы тон. Новы імпартны камбайн аказаўся вельмі дарэчнай дапамогай.
— Гаспадарка мае вялікія пасяўныя плошчы, кожны год вырошчваем тысячы гектараў збожжавых, — расказвае дырэктар Алег Данчанка.— Нагрузка на кожную адзінку тэхнікі велізарная. Таму і летась, і раней жніво ў гаспадарцы завяршалася ў пачатку верасня. Пры нармальнай нагрузцы ў 230—280 гектараў на камбайн за сезон у «Заазер’і» сёлета яна зноў значна перавышаная. Кожны з сямі наяўных камбайнаў вытворчасці «Гомсельмаш» павінен быў бы зжаць больш як па 450 гектараў. Таму New Holland нам сёлета вельмі дапамог.
Але і самі заазерцы не спалі ў шапку, не марнавалі час, а самым актыўным чынам шчыравалі на палях. Маладзёжны экіпаж Сяргея Касцюковіча і Вадзіма Загорскага намалаціў 1053 тоны збожжа і яшчэ 136 тон рапсу. І гэта, заўважце, не на імпартным, а на айчынным камбайне КЗС-1218. Умовы працы на іх, магчымасці, прадукцыйнасць — непараўнальныя. І ўсё ж такі хлопцы стараліся, складалі годную канкурэнцыю. Іх працоўныя поспехі былі заўважаны і адзначаны памятнымі падарункамі і ганаровымі граматамі.
Першым на Лепельшчыне на камбайне айчыннай вытворчасці стаў малады камбайнер Яўген Шамшур, які працуе ў дзяржаўнай сельскагаспадарчай установе «Лепельская сортавыпрабавальная станцыя». Хлопец працаваў адзін, без памочніка.
— Жэня на полі ад рання да змяркання, ледзьве паспявае справіцца па ўласнай гаспадарцы,— расказала жонка камбайнера Алена.— Ён ужо даўно ставіў сабе мэту намалаціць тысячу гектараў, стаць першым. І год за годам ішоў да яе. Летась, напрыклад, стаў першым маладым камбайнерам у раёне, які адолеў планку ў 800 тон. І сыны, дарэчы, бачаць у ім самы найлепшы прыклад, гатовыя разам з бацькам таксама працаваць на камбайне, на трактары.
Кожная гаспадарка Лепельшчыны мае сваіх перадавікоў, на якіх раўняюцца астатнія. У ліку такіх можна назваць экіпажы Сяргея Плігаўкі і Аляксандра Даніленкі з ААТ «Чарэйшчына», Уладзіміра Піскунова і Ільі Дзівіна з КУВСГП «Лепельскае», Аляксандра Багдановіча з ААТ «Лядна» і шмат іншых.
Свой важкі ўклад унеслі і вадзіцелі, якія адвозілі зерне ад камбайнаў. У гэтай катэгорыі першым стаў Сяргей Чуес з «Заазер’я», які быў замацаваны за экіпажам Леаніда Парамонава і Дзмітрыя Скрыпялёва. Больш як па тысячы тон перавязлі яго калегі Аляксей Шпак і Уладзімір Парфяновіч і малады вадзіцель з сельскагаспадарчага вытворчага прадпрыемства «Пражэктар» Анатоль Юшко.
Пра важнасць працы вадзіцеляў красамоўна гаворыць хаця б такі факт, што паўгадзінны вымушаны прастой камбайна азначае, што як мінімум не будзе намалочаны бункер збожжа — пяць тон. Таму вадзіцелі падтрымлівалі свае машыны ў спраўным тэхнічным стане і толькі паспявалі абарачацца па маршруце «поле — зерняток».
На час усяго перыяду палявых работ у гаспадарках было наладжана забеспячэнне гарачым харчаваннем. А на час жніва — двухразовым. Не засталася па-за ўдзелам у такім важным мерапрыемстве, як жніво, культура. Пры Лепельскім раённым доме культуры працуе аўтаклуб, артысты якога за лічаныя хвіліны могуць пад адкрытым небам арганізаваць сцэнічную пляцоўку і выступiць з канцэртам. За час жніва яны аб’ехалі ўсе гаспадаркі, а многія і неаднойчы пабывалі паўсюдна. Таццяна Еўтушэнка, кіраўнік аўтаклуба, казала, што неабавязкова кожны раз ладзіць вялікае выступленне, дастаткова спець тры-чатыры песні падчас абеда — і хлебаробам робіцца весела, настрой узнімаецца.
Намалоты, поўныя свірны збожжа — плён працы не толькі камбайнераў і вадзіцеляў. У агульным караваі — часцінка працы кожнага, хто ўносіў свой пасільны ўклад у такую важную справу.