«Валуны родной сторонки»

У Віцебскай абласной бібліятэцы адбылася прэзентацыя кнігі Антона Параскевіна (Віктара Улюценкі) «Валуны родной сторонки». Віктар Улюценка — краязнаўца, паэт, празаік, урач, член Беларускага саюза журналістаў, член Саюза пісьменнікаў Беларусі. Нарадзіўся і працуе ў Шуміліне. Даследуе гісторыю і культуру Шуміліншчыны, помнікі гісторыі і архітэктуры. эта шостая кніга Віктара Улюценкі. У 2017 годзе пісьменнік намінаваўся на Нацыянальную літаратурную прэмію. Старшыня Віцебскага абласнога аддзялення грамадскага аб’яднання «Саюз пісьменнікаў Беларусі» Тамара Краснова-Гусачэнка расказала пра жыццёвы і творчы шлях Віктара Улюценкі і ўручыла яму вышэйшую ўзнагароду Саюза пісьменнікаў Беларусі — медаль «За вялікі ўклад у літаратуру» (на здымку).

З заслужанай узнагародай і выхадам у свет новай кнігі Віктара Улюценку павіншавалі галоўны спецыяліст галоўнага ўпраўлення ідэалогіі, культуры і па справах моладзі Віцебскага аблвыканкама, член Саюза пісьменнікаў Беларусі Валерый Марчанка, намеснік старшыні Віцебскай абласной арганізацыі ветэранаў Міхаіл Ляшчынскі i iншыя. Цёплыя словы пра роднага чалавека сказала жонка пісьменніка Марыя Мікалаеўна.

Многія творы Віктара Васільевіча прысвечаны духоўным каштоўнасцям, праваслаўным святыням. За літаратурную дзейнасць ён узнагароджаны памятным знакам «200 лет Христианству». Адказваючы на пытанне пра псеўданім, пісьменнік растлумачыў, што ўзяў яго ў гонар святой Параскевы Пятніцы, апякункі ачага, міру, любові. Прысутныя даведаліся і пра тое, чаму менавіта валуны прыцягнулі ўвагу даследчыка роднага краю. Удзельнікі імпрэзы былі прыемна ўражаны песнямі на словы і музыку Віктара Улюценкі, запісы якіх прагучалі падчас сустрэчы. У падарунак чытачам абласной бібліятэкі аўтар перадаў па некалькі асобнікаў сваіх кніг.