Перамогі яшчэ наперадзе
Вельмі прыемна, што моладзь у Шумілінскі РАУС прыйшла старанная, неабыякавая. Хлопцы перспектыўныя, поўныя энергіі і жадання спасцігаць новае. Сярод такіх кіраўніцтва раённага аддзела ўнутраных спраў называе ўчастковага інспектара Паўла Трафімава.
Павел скончыў Акадэмію МУС, атрымаў спецыяльнасць «Правазнаўства».
— Я задаволены, што трапіў у Шуміліна, дзе нарадзіўся і вырас,— кажа хлопец.— Тут жывуць мае сябры, тут усё роднае і знаёмае. Больш таго, прыступаючы да службы, я ўжо добра ведаў калектыў РАУС — тут тры гады запар праходзіў практыку. За мной як за маладым спецыялістам адразу замацавалі настаўніка — участковага Юрыя Сільвестрава. Але ў рабоце дапамагаюць усе калегі — да каго ні звярніся, усе растлумачаць, падкажуць. Увогуле калектыў мне падабаецца, бо тут цёплыя таварыскія адносіны. Многія, як і я, з’яўляюцца членамі БРСМ і захапляюцца спортам.
Магчыма, малады ўчастковы і не такі моцны ў практыцы, але ж па тэорыі ён падкаваны добра. Сам Павел змоўчаў, але яго калегі расказалі: акадэмію хлопец скончыў «з адзнакай», па некаторых юрыдычных пытаннях можа даць кансультацыю і старэйшым.
З першых дзён Павел Трафімаў актыўна ўключыўся ў работу. Яго адміністрацыйны ўчастак — Лаўжанскі сельсавет, які ўключае больш за трыццаць населеных пунктаў. Маладога ўчастковага можна ўбачыць на машынных дварах, на фермах, у школах і дзіцячых садах. Ён часты госць у кватэрах тых гаспадароў, якія стаяць на розных відах прафілактычных улікаў, хто дэбашырыць ці хуліганіць. Адзін з накірункаў работы — гэта прафілактыка. І яна немалаважная — Павел ужо зразумеў гэта на сваім невялікім вопыце. Таму перад выхаднымі ці святочнымі днямі стараецца працаваць дапазна, наведвае праблемныя сем’і, нагадвае пра адказнасць за правапарушэнні.
Прафесія ўчастковага прадугледжвае непасрэдную работу з жыхарамі ўчастка. Паўлу Трафімаву тэлефануюць на мабільны наконт крадзяжоў, сямейных скандалаў, іншых правапарушэнняў. Участковы iнспектар стараецца ва ўсім разабрацца хутка і па законе. Пры гэтым даводзiцца быць і следчым, і аператыўнікам, і псіхолагам. Галоўнае, што ў Паўла Трафімава ўсё атрымліваецца. Пра сваю работу малады міліцыянер кажа коратка: «Нялёгка, але цікава. Мне вельмі падабаецца дапамагаць людзям».
У Паўла Трафімава свае планы на жыццё. У бліжэйшым будучым ён марыць атрымаць вадзіцельскія правы, каб самому можна было ў любы час наведаць самыя аддаленыя вёскі адміністрацыйнага ўчастка. А яшчэ малады ўчастковы займаецца валейболам і футболам. Задаволены, што яго ўключылі ў склад каманды Шумілінскага райаддзела, каб абараняць гонар раёна на абласных спаборніцтвах. Павел Трафімаў упэўнены, што яго асноўныя перамогі яшчэ наперадзе.