ВЕРНІСАЖ Адраджэнне спадчыны: маляваныя дываны
Каляровыя дываны з дзіўнымі жар-птушкамі, казачнымі цмокамі, ільвамі, русалкамі, кветкамі ўпрыгожылі адну з залаў абласнога краязнаўчага музея. Тут адкрыта выстава маляванкі і набіванкі «Сузор’е фарбаў», выкананых членамі Беларускага саюза майстроў народнай творчасці Ірынай Церашковай і Жаннай Іллюшкінай з Лёзна (на здымку).
Калісьці, распісваючы тканіну і набіваючы на яе малюнак, сяляне імкнуліся зрабіць свой побыт прыгожым і ўтульным. Прачнуўшыся, чалавек бачыў перад сабой на сцяне выдатную маляваную казку. Дываны дарылі на юбілеі і вяселлі, у якасці сямейнага абярэга. Мастацтва маляванкі нараджалася ў самой душы народа і паступова стала часткай нацыянальнага дэкаратыўна-прыкладнога мастацтва жыхароў Беларускага Паазер’я. Сучасныя лёзненскія майстрыхі пачалі адраджаць гэты пласт народнай культуры, заснавальнікамі якога ў канцы ХIХ — пачатку ХХ стагоддзя былі Язэп Драздовіч і Алёна Кіш.
Ірына Церашкова першай з беларускіх мастакоў у 2005 годзе звярнулася да традыцыйнай маляванкі і далей працягвала развіваць у дэкаратыўным жывапісе традыцыі народнай эстэтыкі, такім чынам яна распрацавала стылістыку сучасных маляваных дываноў. У работах мастачкі ажываюць прыродныя з’явы і вобразы, адлюстраваны сюжэты беларускіх міфаў і легенд. Жанна Іллюшкіна першай пачала займацца набіванкай, адраджаючы традыцыі віцебскіх майстроў. Яна адлюстроўвае ў сваіх творах раслінныя ўзоры, краявіды, казачныя сюжэты, народныя паданні.
Шматколерныя, радасныя маляванкі, дзе на глыбокім цёмным фоне квітнеюць мудрагелістыя ўзоры і вобразы, набіванкі з тонкім, майстэрскі нанесеным, белым, нібы карункавым, малюнкам, які навявае зімовы настрой, можна ўбачыць у музеі на працягу снежня.