Капусту квасіць і зімой

яняецца час — мяняюцца традыцыі і падыходы да прыгатавання ежы і захоўвання гародніны. Раней капусту квасілі толькі з восені — на вялікую сям’ю нарыхтоўвалі вялікую бочку. Зараз квашаннем можна займацца хоць кожны дзень — свежая капуста прадаецца ў магазіне круглы год. А мно- гія гаспадыні, такiя як Тамара Зайцава з Крывога Сяла Шумілінскага раёна (на здымку), якая ўсё жыццё адпрацавала ў мясцовай гаспадарцы заатэхнікам, а цяпер знаходзіцца на заслужаным адпачынку, захоўваюць капусту са свайго агарода ў падвале.

На думку гаспадыні, лепш квасіць капусту невялікімі порцыямі — тады яна заўсёды смачная і не перакісае. За такім заняткам мы і засталі нядаўна Т. Зайцаву. «У мяне невялікая тарка для капусты — ёю зручна наразаць адзін-два качаны,— кажа Тамара Тарасаўна.— Квашу па рэцэпту, які дастаўся ў спадчыну ад бацькоў. Трэба нашынкаваць 5 кілаграмаў капусты і 150 грамаў морквы. Перамяшаць іх і перасыпаць 50 грамамі солі, дадаць па 1 сталовай лыжцы цукру і кмену. Капусту крыху перацерці, каб пусціла сок, і ўтрамбаваць. Зверху трэба паставіць шырокую талерку, на яе — груз, напрыклад, слоік з вадой, накрыць ручніком, каб яна «дыхала». На наступны дзень пачаць пратыкаць капусту (раніцай і вечарам) драўлянай палкай. Пры пакаёвай тэмпературы 20 градусаў капуста на пяты дзень ужо гатова. Яе можна пакінуць у каструлі, паставіўшы ў халоднае месца, а можна раскласці па слоіках і адправіць у халадзільнік ці падвал.

Дарэчы, для невялікай сям’і можна рабіць і палову порцыі названага рэцэпта. І яшчэ невялічкі сакрэт: пры квашанні нельга карыстацца ёдаванай соллю, інакш капуста атрымаецца мяккай».