«Нашы таленты табе, Прыдзвінскі край!»
Знакавай падзеяй апошніх дзён у аграгарадку Мазалава, што ў Віцебскім раёне, стаў справаздачны канцэрт творчых калектываў устаноў культуры — сельскага Дома культуры і дзіцячай школы мастацтваў. Прайшоў ён пад назвай «Нашы таленты табе, Прыдзвінскі край!».
Канцэрт сабраў на сцэне больш за паўсотні ўдзельнікаў творчых калектываў. У іх ліку — народны жаночы клуб «Залаты ўзрост», народны ансамбль народнай песні і музыкі «Вераснянка», клуб інтэрнацыянальнага сяброўства «Згода», харэаграфічны калектыў Dance, тэатральны гурток «Вобраз», танцавальны калектыў «Калінка» і дуэт настаўнікаў дзіцячай школы мастацтваў «Парафраз».
Кожны канцэртны нумар суправаджаўся відэакліпамі, святламузыкай, харэаграфічнымі замалёўкамі. Запамінальным стаў міні-спектакль «Дзяўчынка з запалкамі» ў выкананні ўдзельнікаў гуртка «Вобраз». Сюрпрызам для ўсіх прысутных стала выступленне ўдзельнікаў клуба «Згода» — замежных студэнтаў з Лівана (навучаюцца ў ветакадэміі), якія выканалі ліванскі народны танец «Дабка».
Перад пачаткам канцэрта гледачы наведалі выставу малюнкаў «Віцебшчыне прысвячаецца…», што разгарнулася ў сельскай бібліятэцы. Аўтарамі работ выступілі замежныя студэнты з Кітая, што навучаюцца ў Віцебскім дзяржаўным універсітэце імя П. М. Машэрава.
Падчас мерапрыемства адбылася супрацьпажарная акцыя «Бяспека — у кожны дом», ініцыятарам правядзення якой стала старшы інспектар групы прапаганды і ўзаемадзеяння з грамадскасцю Віцебскага раённага аддзела па надзвычайных сітуацыях Кацярына Саўчанка.