Смачнае падарожжа Надзейкі
У красавіку пытлівая гарадская дзяўчына Надзейка адправілася ў сваё трэцяе смачнае падарожжа па Полацкім раёне.
Праект «Полаччына гасцінная» па адраджэнні традыцыйнай аўтэнтычнай мясцовай кухні распачаўся запісам цыкла перадач рэгіянальным тэлеканалам «Скіф» і Полацкім раённым цэнтрам культуры. Кулінарны блакнот галоўнай гераіні ўжо папоўніўся рэцэптамі такіх рэдкіх беларускіх страў, як цыбрыкі і раўгеня па-беларуску, рыбнае шчаўе і таўчонікі з макам па-блізніцку, аб сакрэтах прыгатавання якіх, а таксама іншых цікавых падрабязнасцях незвычайных вандровак можна даведацца са старонак «Смачнае падарожжа Надзейкі» сацыяльных сетак «ВКонтакте» і «Одноклассники».
На гэты раз Надзейку чакаюць старажытныя рэцэпты і цікавыя легенды аграгарадка Мацюшы. Мала хто ведае, што ў гэтай мясцовасці каля ракі Званіца існуе Мацюшэўскае скрыжаванне з незвычайным вялізным даравальным камянём Лесуна. Менавіта да яго спакон вякоў прыходзяць гукаць вясну і залагоджваць вельмі паважанага нашымі продкамі мядзведзя-карміцеля і святкаваць Камаедзіцу — старажытнае славянскае свята. Мясцовыя гаспадыні, каб дагадзіць мядзведзю, гатуюць яго самы любімы пачастунак згодна з унікальным рэцэптам — гарохавыя камы па-мацюшэўску. Пра сакрэт іх прыгатавання ў гэтым кутку Полаччыны, а таксама пра тое, адкуль з’явіўся тут таямнічы камень, і раскажа трэцяе «Смачнае падарожжа Надзейкі» ў аграгарадок Мацюшы.