«Беларусы» ўразілі
Сучасная арт-група «Беларусы» ў Віцебскай абласной філармоніі выканала выбраную праграму «Галасы без межаў» з сусветна вядомых твораў. Папулярныя песні ў эстрадных апрацоўках, сярод іх — беларускія творы, іспанскія серанады, аргентынскае танга, рамантычныя мелодыі Сінатры, цыганскія рамансы, песні з савецкіх кінафільмаў, гучалі на розных мовах. Канцэрт прайшоў пры поўным аншлагу. У складзе «Беларусаў» пяць салістаў, усе яны прафесійныя музыканты — выпускнікі кансерваторыі, музычных спецыяльнасцяў універсітэта культуры, педагагічных навучальных устаноў. — Разам у адным калектыве сабраліся ўнікальныя галасы,— сказаў стваральнік і кіраўнік групы, кампазітар, выканаўца Валерый Шмат,— гэта тры тэнары, розныя па гучаннi — лірычны, эстрадны і тэнар опернага плану, барытон і бас. Гэта палітра мужчынскіх галасоў дазваляе спяваць практычна ўсё, нават жаночыя партыі з твораў Моцарта. Удзельнікі групы займаюцца не толькі канцэртнай дзейнасцю, але і педагагічнай — пры калектыве дзейнічае студыя «Залатыя галасы». Яе выпускнікі — лаўрэаты вядомых конкурсаў «Еўрабачанне», «Новая хваля», «Славянскі базар у Віцебску», удзельнікі расійскага праекта «Голас». За вялікі ўнёсак у развіццё беларускай музычнай культуры і выхаванне маладых талентаў Валерый Шмат атрымаў дзяржаўную ўзнагароду — медаль Францыска Скарыны.