Гарачы ліпень абітурыента

На календары 18 ліпеня, на гадзінніку 14.00. А на першым паверсе адной з вядучых ВНУ вобласці і краіны — Віцебскага дзяржаўнага ўніверсітэта імя П. М. Машэрава — цішыня і спакой. Па калідоры прагульваюцца і мірна перагаворваюцца паміж сабой на незнаёмай мове абітурыенты, якія паступаюць на факультэт навучання замежных грамадзян. — Прыйшлі б вы да нас учора,— з усмешкай кажа адказны сакратар прыёмнай камісіі ВДУ Алена Віцько,— тады б даведаліся, што такое сапраўдны ажыятаж. Тут, як і ва ўсіх вышэйшых навучальных установах краіны, 17 ліпеня скончыўся прыём дакументаў для атрымання вышэйшай адукацыі за кошт бюджэту. Трымаючы руку на пульсе, многія аддаюць дакументы ў тую ці іншую ВНУ літаральна ў апошнюю хвіліну, арыентуючыся на свае балы і інфармацыю, якая аператыўна абнаўляецца на сайтах устаноў. Вось і выходзіць, што ў апошні дзень прыёму дакументаў гэты працэс дасягае сваёй кульмінацыі. Сёлета на дзённую бюджэтную форму навучання ВДУ імя П. М. Машэрава гатовы прыняць 389 студэнтаў. Адзначым, што летась даводзіўся план 426 чалавек. Усяго ў прыёмную камісію паступіла 716 заяў, і ў выніку агульны конкурс склаў 1,8 чалавека на адно бюджэтнае месца на дзённай форме. 151 чалавек падаў дакументы на завочную форму атрымання адукацыі на поўны, 256 — на скарочаны тэрмін навучання. Там конкурс склаў 1,8 і 2,6 чалавека на месца адпаведна. Дзевяць факультэтаў універсітэта прапануюць сваім студэнтам навучанне па больш як трох дзясятках спецыяльнасцяў, сярод якіх, напрыклад, «Камп’ютарная бяспека», «Праграмнае забеспячэнне інфармацыйных тэхналогій», «Музычнае мастацтва, рытміка і харэаграфія», «Біяэкалогія», «Дызайн», «Міжнароднае права» і іншыя. Зараз патэнцыяльныя студэнты і іх бацькі затаіўшы дыханне чакаюць 23 ліпеня — у гэты дзень пройдзе залічэнне абітурыентаў у студэнты. А пакуль яны могуць рабіць нейкія вывады, арыентуючыся на мінулагодні прахадны бал. Вось, напрыклад, летась для таго, каб паступіць на спецыяльнасць «Гісторыя і грамадазнаўчыя дысцыпліны», трэба было набраць 267 балаў. Тады, як і сёлета, на адно месца прэтэндавалі 1,4 чалавека. А вось на спецыяльнасць «Геаграфія (навукова-педагагічная дзейнасць)» летась ішоў адзін чалавек на месца са 130-ццю баламі. Сёлета ж на адно бюджэтнае месца прэтэндуе 1,6 чалавека пры тым жа плане прыёму 16 чалавек. На некаторых факультэтах у абітурыентаў ёсць магчымасць выбіраць некалькі спецыяльнасцяў адразу. Гэта тычыцца тых, чый лёс літаральна вырашаюць некалькі балаў. Яны таксама могуць стаць студэнтамі, трапіўшы на крыху менш прэстыжную спецыяльнасць. З 18 па 24 ліпеня ў ВДУ праходзяць унутраныя ўступныя іспыты як для дзённай, так і для завочнай форм навучання. У любым выпадку паступленне ў ВНУ — бадай, самы жорсткі конкурс, самы хвалюючы іспыт з усіх, што выпадаюць на лёс чалавека. Ёсць адчуванне, што выбар будучай прафесіі — крок куды больш адказны і важны, чым нават выбар спадарожніка жыцця. Калі, вядома, дазволіць сабе параўноўваць гэтыя працэсы. Усім поспеху, і тым, хто набудзе жаданы статус студэнта, чым на бліжэйшыя некалькі год вызначыць рытм і напоўненасць свайго жыцця, і тым, хто на гэтым этапе сыдзе з дыстанцыі. Няхай усё складваецца найлепшым чынам.