Фестываль моцных духам
У час «Славянскага базару» прайшоў штогадовы міжнародны фестываль творчасці інвалідаў «Віцебск-2018»
Сёлета маштабнае мерапрыемства прысвечана 30-годдзю Беларускага таварыства інвалідаў (Бел ТI), якое і было галоўным арганізатарам імпрэзы. Пра яго размах сведчыць ўжо той факт, што арганізатары задзейнічалі адразу тры пляцоўкі. Урачыстае адкрыццё і конкурсную праграму прыняў Палац культуры чыгуначнікаў, на наступны дзень удзельнікі пераехалі ў Культурна-гістарычны комплекс «Залатое кола горада Віцебска «Дзвіна», і, нарэшце, прайшоў канцэрт на сцэне на плошчы Свабоды. Радуе, што ў апошнія гады ў нашай краіне актыўна развіваецца безбар’ернае асяроддзе, і людзі з абмежаванымі магчымасцямі пачынаюць адчуваць сябе паўнавартаснымі грамадзянамі. Так, у таварыства сёння ўжо ўваходзяць больш за 50 тысяч членаў. Гасцей вітаў старшыня абласной арганізацыі БелТІ Міхаіл Каралюн. Але напачатку ён прапанаваў ушанаваць хвілінай маўчання тых, хто пайшоў з жыцця за мiнулы год пасля папярэдняга фестывалю. Міхаіл Ягоравіч зачытаў асабістае пасланне старшыні Цэнтральнага праўлення таварыства Уладзіміра Патапенкі. Радуе, што на свята прыязджаюць людзі з усіх куткоў Беларусі, а таксама з-за яе межаў. Ад імя замежных гасцей слова ўзяў прэзідэнт фонда «Філантроп» Усерасійскага таварыства інвалідаў Генадзь Анечкін. Ён уручыў падарункі беларускім калегам, а таксама нязменнаму старшыні музычнай часткі конкурсу — народнаму артысту СССР і Беларусі кампазітару Ігару Лучанку. Людзі з інваліднасцю паказвалі свае таленты ў розных накірунках. Паэзія, акадэмічны вакал, танцы, жывапіс, дэкаратыўна-прыкладное мастацтва — гэта далёка не поўны пералік усіх намінацый. Штогадовы форум мае вялікае значэнне для людзей з абмежаванымі магчымасцямі і тых, чыя прафесія звязана з аказаннем дапамогі людзям з інваліднасцю. І вызначаныя напачатку мэты — стымуляваць развіццё мастацкай творчасці інвалідаў, папулярызаваць пазітыўны імідж інваліда, дапамагчы яму актыўна інтэгрыравацца па ўсіх накірунках жыцця грамадства — усё бліжэй да свайго здзяйснення. А пераможцамі сталі ўсе ўдзельнікі — тыя, хто пераадолеў свае фізічныя слабасці і прадэманстраваў на фестывалі творчыя здольнасці. Як пранікнёна сказаў Ігар Лучанок, «гэты фестываль незвычайны, таму што тут гучаць спевы душы. А праз душу, сэрца і жыццялюбства мы і жывём».