«Сяброўства без межаў»
У санаторыі «Чыгуначнік» УП «Віцебскае аддзяленне Беларускай чыгункі» адбылося пад гэтай назвай свята нацыянальных культур, у якім прынялі ўдзел больш за паўсотні артыстаў і двухсот гледачоў. Асноўная дзея мерапрыемства праходзіла ў паркавай зоне санаторыя, дзе ладзіліся тэматычныя выставы «Гісторыя Лятчанскага краю», «Веліканаў хутар», «Беларуская хата», «Танцавальныя касцюмы народаў свету», прадстаўленыя Віцебскім раённым гісторыка-краязнаўчым музеем, і канцэртная праграма «Сяброўства народаў» з удзелам сямейнага ансамбля Pereansambel -ihnu Virve, вакальна-харэаграфічнага калектыву Rahvuskultuuriselts -irmas (Эстонія), вакальнага ансамбля «Калінка» і танцавальнага калектыву «Аллар» (Віцебск). Упрыгожаннем мерапрыемства стаў майстар-клас па выкананні беларускіх і эстонскіх побытавых танцаў. Не менш запатрабаванай стала дзіцячая гульнёвая пляцоўка, дзе для дзяцей і падлеткаў, што адпачываюць у аздараўленчым лагеры «Магістраль» і санаторыі «Чыгуначнік», праводзіліся творчыя майстар-класы ад супрацоўнікаў Віцебскага і Шумілінскага раённых цэнтраў рамёстваў. Цікавай стала і выстава малюнкаў. Тут жа на працягу свята Віцебскім РАНС у межах акцыі «Канікулы без дыму і агню» праводзіліся навучальныя тэматычныя мерапрыемствы з дэманстрацыяй пажарнай тэхнікі і абсталявання. Фінальнай кропкай свята стала дыскатэка пад адкрытым небам, дзе гучалі песні на розных мовах свету.