Дэбют на хлебнай ніве
Першымі ў Аршанскім раёне да масавай уборкі ўраджаю прыступілі хлебаробы філіяла «Цяплічны» РУП «Віцебскэнерга». На спробнае жніво камбайны выйшлі ў поле ўжо ў пачатку тыдня.
Намеснік дырэктара па раслінаводстве Віктар Дубянец ведае, што ў хлебаробскай справе важная не толькі хуткасць. На першым плане — якасць. — Усяго нам неабходна ўбраць 636 гектараў азімай пшаніцы, 310 — ячменю, 300 — зернебабовых культур,— расказвае Віктар.— Пакуль што сярэдняя ўраджайнасць трымаецца на ўзроўні не менш за 40—42 цэнтнера з гектара. Улічваючы сёлетнія ўмовы надвор’я, гэта добры паказчык. Без хлеба не застанемся. Усе неабходныя работы па доглядзе і апрацоўцы пасеваў праведзены своечасова, тэхналогія вытрымана ў поўным аб’ёме, цяпер справа за камбайнерамі. Пяць экіпажаў камбайнераў філіяла «Цяплічны» ўбіраюць сёлетнi ураджай. Два з іх працуюць на новенькіх камбайнах, якія былі набыты за сродкі Прамагралізінгу. Амаль што ўсе хлебаробы — прафесіяналы сваёй справы. Напрыклад, сямейная брыгада Сінкевічаў — бацька Уладзімір і сыны-блізняты Яўген і Кірыл — у мінулым годзе была сапраўднай зоркай жніва. Не намераны яны саступаць сваіх лідзіруючых пазіцый і зараз. Ёсць і дэбютанты на жніве — экіпаж камбайнераў у складзе Васіля Клімянкова і Аляксея Вітвера, якім даверылі камбайн «Палессе» новай мадыфікацыі GS-12А1 з павялічаным аб’ёмам бункера. Васіль Клімянкоў у філіяле «Цяплічны» працуе другі год, а вось Аляксей Вітвер пакуль што навучэнец Віцебскага дзяржаўнага прафесіянальна-тэхнічнага каледжа. Падчас летніх канікулаў упершыню вырашыў на сабе адчуць, што такое хлебаробскі лёс. Для высокай арганізацыі работы на жніве ў філіяле «Цяплічны» РУП «Віцебскэнерга» створаны ўсе неабходныя ўмовы. Вялікая ўвага нададзена пытанням аховы працы, пажарнай бяспекі, харчавання. Аграрыі, як заўсёды, пастараюцца прыкласці ўсе намаганні, каб своечасова ўбраць хлеб з палёў. І няхай ім падчас працы спрыяе добрае надвор’е!