Галоўны летні клопат
Зараз справа першачарговай важнасці — нарыхтоўка кармоў, якая павінна весціся ў тэмпе, пакуль травы не перараслі.
Дзеля гэтага ў сельгаспрадпрыемстве «Лаўжанскае» Шумілінскага раёна створаны атрад па кормаўборцы. Да мясцовых механізатараў далучыліся прыезджыя з Віцебскага мясакамбіната, у інтэграцыйную структуру якога ўваходзіць гаспадарка.
— Да нас прыехалі кормаўборачныя камбайны «Ягуар» і КВК, два трактары з дзевяціметровай касілкай і граблямі, прэс-падборшчык і два «Кіраўцы» на адвозку, — расказала галоўны аграном гаспадаркі Вольга Каралёва. — Дзеля зручнасці работу арганізавалі адразу на двух участках — за Мікіціхай і ў Мазурыне. За дзень нарыхтоўваем па 300–400 тон сенажу. Мяркуем назапасіць каля 30 кармавых адзінак на адну ўмоўную галаву жывёлы.
Акрамя гэтага, сельгаспрадпрыемства нарыхтоўвае і сілас з азімай свірэпіцы, саломы і правяленай масы шматгадовых траў.
У мінулым годзе быў добры вопыт нарыхтоўкі такіх кармоў — яны захаваліся добра. Вось і сёлета ля жывёлагадоўчага комплексу, дзе ўтрымліваецца больш за пяць тысяч галоў жывёлы, заклалі траншэю амаль у паўтары тысячы тон.
Разам з аграномам едзем ва ўрочышча, дзе працуюць лаўжанскія механізатары. На палетках стаіць духмяны пах разнатраўя — тут падсеяныя канюшына, цімафееўка, купкоўка.
— Палеткі сухія, тэхніка ідзе добра, — кажа адзін з вопытных механізатараў Сяргей Новікаў. — Ды і надвор'е спрыяе ўборцы траў, якія выраслі нядрэннымі. Так што працуем увесь светлавы дзень. Скошваю да 15 гектараў за дзень, а мой маладзейшы калега Андрэй Чэклін і таго больш, бо мае шырэйшую касілку.
Сельгаспрадпрыемству «Лаўжанскае» першым укосам трэба скасіць
1536 гектараў, нарыхтаваць сена 760 тон, 23500 тон сенажу, 19 тысяч тон сіласу.