Пад моцным крылом аграаб’яднання
У гэтым годзе пераможцам абласнога спаборніцтва сярод аграпрамысловых аб’яднанняў на ўборцы зерневых і зернебабовых культур стала ААТ «Верхнядзвінскі масласырзавод».
Уаграпрамысловае аб’яднанне на базе Верхнядзвінскага масласырзавода ўваходзяць восем сельскіх гаспадарак і райаграсэрвіс. Ідэя ў тым, каб арганізаваць працэс эфектыўнай вытворчасці «ад поля да прылаўка», аб’яднаць вытворцаў і перапрацоўшчыкаў у адной сыравіннай зоне.
Завод аказвае сельгаспрадпрыемствам усебаковую дапамогу ў рамонце тэхнікі, набыцці насення, сродкаў абароны раслін, абсталявання для ферм, камбікармоў, паліва. Значныя сродкі накіраваны на падрыхтоўку і набыццё тэхнікі да важных сельскагаспадарчых кампаній.
— Як і ў мінулым годзе, гаспадаркі аграаб’яднання разлічвалі на большы ўраджай, — расказвае дырэктар завода Васіль Губанаў. — Атрымалі звыш за 27 тысяч тон зерневых, 2643 тоны рапсу. Планам перашкодзіла «нябесная канцылярыя». Каб мець стабільную ўраджайнасць і больш якаснае збожжа, у наступным сезоне на 40 працэнтаў павялічым плошчы пад азімыя культуры і зробім стаўку на выгадныя зернебабовыя і крыжакветныя. У рамках эксперымента пасеем каля 200 гектараў азімага ячменю — гэта новая культура для раёна. Нягледзячы на няпростыя ўмовы надвор’я, удалося ў сціслыя тэрміны выканаць дзяржзаказ, прычым усё зерне — харчовай групы.
Кіраўнік удзячны за прафесійны падыход мехатраду масласырзавода, які створаны на базе прадпрыемства яшчэ ў 2017 годзе. З тае пары без гэтых механізатараў не абыходзіцца ніводная сельскагаспадарчая кампанія.
Ён цалкам укамплектаваны кваліфікаванымі кадрамі, на рахунку якіх нямала працоўных перамог: многім вядомы імёны Арсенія Барыкіна, Аляксандра Дарожкі, Уладзіміра Лося, Дзмітрыя Лакоткі, Дзмітрыя Конаха, Арцёма Цвяцінскага, Сяргея Дрыжова, Юрыя Друца, Дзяніса Гагалінскага, Сяргея Кудзеліча і Генадзя Заляцілава. Кіруе работай атрада вопытны інжынер-механік Сяргей Грынько. Машынны парк мехатрада штогод папаўняецца новай тэхнікай.
І хаця гарачая пара ўборкі скончана, дапамога мехатрада па-ранейшаму запатрабавана: на ворыве пад азімую сяўбу, апрацоўцы глебы, сяўбе, уборцы кукурузы і іншых відах работ. У аграрыяў няма часу на перапынак — ужо сёння яны заклапочаны будучым ураджаем.