ДЫНАМІЧНАЕ РАЗВІЦЦЁ
— З намалоту новага ўраджаю ў першую чаргу выканалі дзяржзаказ —здалі 102 тоны рапсу, — расказаў дырэктар ААТ «Навасёлкі-Лучай» Юрый Шымчык. — Яшчэ 100 прадалі. Алейнае насенне сёлета мела добрую цану — 1500 рублёў за тону. Для параўнання: за тону пшаніцы плацілі 380 рублёў, гароху — 570. Астатняе насенне перапрацоўваем у сваім падсобным цэху. Рапсавы алей прадаём. Ён выкарыстоўваецца для выпуску маргарыну, маянэзу. А макуха ідзе на вытворчасць камбікорму для буйной рагатай жывёлы.
— Рапс — адна з культур, вытворчасць якой дынамічна развіваецца
ў раслінаводстве, — зазначыла галоўны аграном гаспадаркі Алена Касцюк. — Але і вырошчваць яго няпроста. На адным полі можна сеяць не часцей чым раз на пяць гадоў. Добрымі папярэднікамі рапсу з’яўляюцца канюшына, іншыя шматгадовыя травы, зерневыя і зернебабовыя. З восені ўносім гліфасаты, а таксама фосфар і калій, вясной дасканала апрацоўваем глебу і ўзбагачаем яе азотам. Сеем суперэлітнае і элітнае насенне беларускага гатунку «імперыял», практыкуем і гібрыды замежнай вытворчасці. Спачатку насенне ў невялікай колькасці (каля 100 кілаграмаў) набываем у рэспубліканскім навукова-практычным
СУББОТА l 18 сентября 2021 г. № 106 l www.vitbichi.by
цэнтры. Расход на гектар складае ад 3,5 да 5 кілаграмаў. На наступны год маем свайго насення ў дастатковай колькасці. Строга прытрымліваемся тэхналагічных параметраў. Важна, каб раслінкі добра ўкараніліся і ў зіму ўвайшлі моцнымі. Калі восень доўгая і цёплая, уносім ростарэгулятар, які садзейнічае раскушчванню. На ўраджайнасці адбіваецца надвор’е. Зімой хвалюемся, каб раслінкі не пашкодзіў мароз. Не на карысць ім і зацяжная вясна.
Немалаважную ролю адыгрывае чалавечы фактар. Сяўбу рапсу давяраюць аднаму з найвопытнейшых і адказнейшых механізатараў — Юрыю Татарчуку. Мінеральныя ўгнаенні ўносілі Уладзімір Скавародка, Ігар Масінкевіч, Генадзій Анкудовіч. Пасевы трэба своечасова апрацоўваць ад шкоднікаў і хвароб. Гэта клопат Алега Чумакова. Сёлета гаспадарка набыла высокапрадукцыйны самаходны апырсквальнік «Грым Максі». На новым агрэгаце механізатар дабіваецца высокай выпрацоўкі.
— Пасевы пастаянна маніторым, — працягвала Алена Касцюк. — Стараемся не ўпусціць тэрміны хімпраполкі, апрацоўкі, уборкі. На камбайнах выкарыстоўваем такое абсталяванне, як рапсавы стол, з дапамогай якога ўдаецца пазбегнуць празмерных страт насення. Важны этап — дапрацоўка. Калі насенне перасушыць — яно страціць алеістасць, калі недасушыць — пакрыецца цвіллю. Сёлета яго сушылі на «Лідзе» аператары зернесушылкі Аляксей Касарэўскі, Аляксей Зямчонак, Пётр Ясінскі і Юрый Качан.
Бягучай восенню ў ААТ «Навасёлкі-Лучай» азімы рапс пасеялі на 800 гектарах, павялічыўшы пасевы амаль на 200 гектараў. Ёсць разлік, што ў наступным годзе культура прынясе гаспадарцы добры прыбытак.