Героі лепельскіх палеткаў
Сёлетні ўраджай земляробам Лепельшчыны даўся нялёгка. Мінулай восенню азімыя культуры сеялі з цяжкасцямі, самай галоўнай з якіх быў недахоп паліва. Вясной вялікія праблемы аграрыям падкінула надвор’е, дажджы больш за тыдзень не давалі тэхніцы выехаць у поле. Складвалася часам прыкрая сітуацыя, калі трактар і пасяўны агрэгат адрамантаваныя і настроеныя, паліва поўныя бакі, насення цэлыя бункеры, людзі гатовыя працаваць дзень і ноч, а пасяўная застопарылася, бо дажджом за тыдзень поле так здобрыла, што не можа на яго заехаць нават самая магутная тэхніка. Як казалі старыя аграномы, поле адначасова кліча і не пускае. Летам жа на змену дажджам прыйшла спёка: за два месяцы высушыла глебу, і ў той час, калі зерню трэба было налівацца, не хапала такой патрэбнай вільгаці. І ўсё ж такі, да ўборкі сёлета ў Лепельскім раёне выраслі збажына і крыжакветныя больш як на 14 тысячах гектараў.
Камбайнеры СВФ «Заазер’е» ААТ «Віцебскі мясакамбінат» з першых дзён жніва ўзялі высокі тэмп, кожны дзень прыбаўляючы дзясяткі тон. За ўборачную кампанію Леанід Аляксеенка і Сяргей Калбасаў намалацілі 2203 тоны збожжа і 165 тон насення рапсу і занялі трэцяе месца ў трэцяй групе ў сваёй намінацыі.
І хаця гэты паказчык нашмат меншы за леташні, аднак для сёлетніх умоў надвор’я — вельмі высокі. Для нагляднасці: хлопцы за няпоўныя два месяцы ўборачнай кампаніі запоўнілі састаў у 39 вагонаў — па вагону ў дзень.
Маладая гаспадарка «Баброва-Агра» ЗАТ «Віцебскаграпрадукт» холдынга «Славянскі Велес» на землях Лепельшчыны збірае толькі чацвёрты ўраджай, але заяўляе пра сябе гучна. І ў мінулым годзе, і сёлета тысячнымі намалотамі адзначыліся два экіпажы: Анатоль Петухоўскі і Ілья Мацвееў, Аляксандр і Пётр Зябко (сын і бацька). У гэтым жа годзе гаспадаркай быў набыты новы высокапрадукцыйны імпартны камбайн New Holland CR9.90. Яго адметнасцю з’яўляецца паўгусенічны ход. Падобная тэхніка істотна даражэйшая за класічную колавую, аднак, як паказвае шматгадовая практыка, трэба, каб у гаспадарцы быў на ўзбраенні хаця б адзін такі камбайн. З ім лягчэй убіраць збажыну падчас дажджлівага лета, калі глеба расквашваецца ад залішняй вільгаці. Такія камбайны і трактары больш упэўнена адчуваюць сябе на тарфяніках.
Разам «Заазер’е» і «Баброва-Агра» апрацоўваюць больш за палову зямель Лепельшчыны, прычым апошняя сельгасарганізацыя гаспадарыць яшчэ на палетках Ушацкага, Чашніцкага, Талачынскага раёнаў.
Ад гігантаў стараліся не адставаць гаспаркі меншыя: «Пражэктар-Агра», «Лепельскае», «Чарэйшчына», «Ладасна», «Лепельскі райаграсэрвіс». У іх на ўзбраенні няма імпартнай тэхнікі, усе працуюць на камбайнах «Палессе» розных мадыфікацый і гадоў выпуску, збожжа ад іх адвозяць на МАЗах, зямлю апрацоўваюць трактарамі МТЗ. Аднак усе тэхналагічныя аперацыі стараюцца праводзіць у аптымальныя агратэхнічныя тэрміны, якасна, каб атрымаць ад зямлі самую высокую аддачу.