На багатых балотных уладаннях
Тры ўчасткі структурнага падраздзялення ВУ «Віцебскторф» — у Обалі (Шумілінскі раён), Крулеўшчыне (Докшыцкі раён) і пасёлку Акцябрскі (Чашніцкі раён) — працуюць роўна, рытмічна і рэнтабельна. Менавіта ад развіцця вытворчасці, на чале якой стаіць дырэктар УП «Віцебскаблгаз» Пётр Шэршань, напрамую залежаць заробак людзей і іх дабрабыт.
Каб на свае вочы ўбачыць, як ідуць работы па нарыхтоўцы торфу і падрыхтоўцы палёў, мы накіроўваемся да людзей, якія працуюць на балоце. Да тарфянога радовішча Сідзень з Обалі амаль дваццаць кіламетраў. Тут, у лясным масіве за вёскай Купніно, работа ў разгары. Прызнацца, думалі сфатаграфаваць нарыхтоўку торфу на гадавы запас.
— Спазніліся! — заўважыла начальнік участка Галіна Ножнікава. — Мы ўключылі стаханаўскі рэжым: за май — ліпень нарыхтавалі 18 тысяч тон торфу (114 працэнтаў да ўзроўню мінулага года). Калі ў мінулыя гады займаліся нарыхтоўкай яшчэ і ў верасні, то сёлета нарыхтавалі сыравіны амаль на дзве тысячы тон больш, чым у мінулым годзе. І гэта ўсё за няпоўныя тры месяцы. Па-першае, у рабоце сёлета вельмі дапамагала надвор’е. Дажджоў практычна не было, і гэта нам на руку. Па-другое, правільна арганізавалі працоўны графік: рабочы дзень пачынаўся з пяці гадзін раніцы і доўжыўся да абеду. А пасля яго, у самую спёку, людзі маглі адпачыць і набрацца сіл.
Падчас нашага прыезду на радовішчы падрыхтоўвалі палеткі да новага сезону здабычы торфу. Радовішча Сідзень, якое налічвае 170 гектараў, трэба ачысціць ад карчоў, потым іх ссунуць у валок і вывезці з балота. Гэтай складанай работай на спецыяльна абсталяванай тэхніцы займаліся механізатары Сяргей Ціханенка, Мікалай Волкаў і Юрый Бучкін.
Разам з Галінай Ножнікавай абыходзім балотныя ўладанні, дзе бачныя вынікі летняй работы механізатараў, якія працавалі з варашылкамі, прэс-барабанамі, пыласосамі і іншай спецыяльнай тэхнікай.
— Залежы торфу мы падымалі наверх, варушылі, сушылі і складвалі ў штабялі. Іх усяго 70, у кожным — па 200–300 тон, — падзялілася Галіна Ножнікава. — Штабялі мы накрываем плёнкай, спецыяльнымі прыборамі вымяраем тэмпературу торфу, каб не пераграваўся. Першым тысячу тон нарыхтаваў наш механізатар Аляксандр Захараў, а ўвогуле за сезон на рахунку механізатараў па чатыры тысячы тон сыравіны.
Штабялі на працягу года будуць вывозіць з балота вагонамі. Цеплавоз за адну паездку адвозіць па дваццаць вагонаў, у кожным з якіх змяшчаецца па пяць тон торфу. Ста тон хапае на дзень работы для цэха перапрацоўкі.
Механізатарам да зімы трэба пачысціць каналы на ўсіх дзесяці тарфяных палетках радовішча Сідзень, каб з балота сыходзіла вада і зручна было
працаваць у наступным сезоне.