Падуладны ёй i Папялушка, i Баба Яга
Амаль нiводнае значнае мерапрыемства ў Вiцебскiм раёне не праходзiць без удзелу Сняжаны Чульбы. Вось ужо 15 год гэты творчы i апантаны чалавек шчыруе на нiве культуры раёна, рэалiзуючы сваю дзiцячую мару пра сцэну i выступленнi перад гледачамi.
Ушкольныя гады Сняжана была актыўнай удзельнiцай тэатральнага гуртка «Мара» абласнога палаца дзяцей i моладзi, пазней — сябрам тэатральнай студыi Вiцебскага раённага дома культуры, што паспяхова дзейнiчала пад кiраўнiцтвам вядомага на Вiцебшчыне рэжысёра Аляксандра Нiсневiча. Пасля школы паступiла ў Вiцебскае дзяржаўнае вучылiшча мастацтваў, дзе скончыла акцёрскае аддзяленне.
Першым месцам працы Сняжаны Рыгораўны стаў сельскi Дом культуры ў Вялiкiх Лётцах. Затым больш за 8 гадоў кiравала яна лялечным i тэатральным калектывамi ў Кiраўскiм сельскiм доме культуры. Тут жа займала пасаду мастацкага кiраўнiка. З 2015 года шчыруе ў Даўжанскiм СДК, акрамя гаспадарчай справы займаецца i творчасцю — з’яўляецца кiраўнiком двух калектываў аматарскай творчасцi, арганiзуе i праводзiць разнапланавыя мерапрыемствы. Сняжану Рыгораўну можна пабачыць як у ролi вядучай урачыстых мерапрыемстваў, так i ў казачных вобразах Бабы Ягi, Папялушкi, Каралевы…
Творчыя калектывы пад кiраўнiцтвам Сняжаны Чульбы неаднаразова станавiлiся пераможцамi раённых i абласных конкурсаў «Лялечны свет», «Тэатральныя далягляды вёскi» i iншых.
За актыўны ўдзел у культурным жыццi Прыдзвiнскага краю, высокi прафесiяналiзм ёй выказана падзяка раённага выканаўчага камiтэта, узнагароджана яна i граматай раённага Цэнтра культуры i творчасцi.
Як адзначае Сняжана Рыгораўна, галоўным стымулам для яе з’яўляюцца ўдзячныя апладысменты i ўсмешкi гледачоў, бо справа работнiкаў культуры i заключаецца ў тым, каб дарыць людзям добры настрой i ствараць святочную атмасферу.