Labanta pa N muda lansol!

Un bes, tenba un omi ki gostaba di trosa di algen. Se nomi era Ze Txitxarinhu.

Txiga un tenpu ki Ze Txitxarinhu staba dentu Purtugal sen trabadju. El ta dividiba un kuartu ku mas un Kabuverdianu (ki ta txomada Txiku) i un Purtuges (ki ta txomada Kalú). Es tudu 3 staba sen trabadju. Kabu staba-es mau.

Kel dia, es 3 rapas konsigi ranja trabadju nun obra. Es tenba ki sta na dia siginti 8 ora palmanhan na kel obra. Pa es txiga na obra na ora, es tenba ki sai di kaza mas tardar mas tardar 6 ora palmanhan.

Txiku tenba sonu pizadu. Trokadu kel li, el pidi ses kunpanheru di kuartu pa korda-l 5 ora palmanhan, istu e, ora ki es tanbe ta labanta.

Kantu txiga ora di es labanta, Txiku ka korda. Kes otu rapas labanta, mas ka korda Txiku. Na nves di es korda Txiku, Ze Txitxarinhu uza un tinta (ki un palhasu daba-el) pa pinta rostu di Txiku. Txiku kontinua na sonu duranti tudu kel tenpu di pintura di se rostu. Txiku era pretu, mas el fika ku rostu di algen branku.

Na ora ki Ze Txitxarinhu ku Kalú sa ta saiba di kuartu pa trabadju, Ze Txitxarinhu ba spanta Txiku, ta finji ma dja el konxe txoma-l, mas ma el Txiku staba ku prigisa di labanta:

- Txiku, Txiku, N ka ta txoma-bu mas! Mos, bo e prigisozu! Forti N sta xatiadu ku bo! Di tudu manera, bo e sinhor di bu naris – dja bu disidi ka ba kel trabadju la, dja sta disididu! Ben, nos dja nu sai!

Txiku labanta fakati. Txiku ka podeba perde kel enpregu! Txiku ka tenba tenpu nen di laba rostu. El kaba bisti na rua.

Na ta bai ta kore pa stason di autokaru, Txiku, ki inda ka kababa di korda dretu, pasa dianti di un montra. Kel montra, na kel mumentu, staba ta funsiona sima un spedju. Kantu Txiku da ku odju na montra, el fla se kabesa xatiadu si:

- Odja kuze ki kel buru di Ze Txitxarinhu dja faze?! Na nves di el korda-m, el ba korda kel Purtuges rostu branku!

Kantu Ze Txitxarinhu volta di Purtugal, el sai ku abri un taberna. El tenba un kunpadri ki txomaba Txeka. Txeka ta tomaba merkadoria fiadu pa paga na fin di mes. Es Txeka tenba kel 4ª-klasi antigu i el tenba mania ma el era bon na purtuges. Nun fin di mes, Txeka ba paga se konta:

- Kunpadri Ze, nhu soma nha divida di es mes!

- E dentu faxi!

Ze Txitxarinhu ba djobe un kaixinha di sapatu na pundi el ta meteba tudu vali. El ben, el sipara kes vali di se kunpadri Txeka. Dipos, el kumesa faze un arolamentu di kes vali di se kunpadri:

- Dja sta, kunpadri Txeka! – Ze Txitxarinhu longa-l rilason.

Txeka kumesa ta konfiri rilason. El konfiri ti te, el para:

- Mas, kunpadri Ze, anho sima nho e bazofu, nho ki ta sta ta gaba ma nhu prende purtuges la na fonti, istu e, la Lisboa di Purtugal, pa nhu ta ben skrebe asukar ku 2 S!? Omi, asukar ta akrebedu ku Ç!

- Mas, kunpadri Txeka, N ka ten kulpa si lingua purtuges ten un ortografia sen lojika, ki ta iziji pa algen dikora-l. Era pa N skrebeba-el na lingua kabuverdianu, ku alfabetu kabuverdianu ofisial, ki ten un ortografia lojiku. Di tudu manera, pamodi nhu le-l asukar na nves di aros!?

Nun epuka, tenba un mos ki kustumaba durmi na banku di prasa frenti Pasus di Konselhu di Sanvisenti. Na kel mesmu epuka, Ze Txitxarinhu staba pintor la Ilha di Portu Grandi. Prizidenti di Kamara di Ilha di Monti Kara kontrata Ze Txitxarinhu pa ba pinta bankus di prasa frenti Kamara Munisipal. Antis di manxe, Ze Txitxarinhu ba pa es prasa pa ba pinta bankus. El korda mos ki kustumaba durmi na un di kes banku:

- Labanta pa N muda lansol! Labanta pa N muda lansol! Labanta pa N muda lansol!