Kal ki e prujetu di kada kandidatu pa nos lingua maternu?
Abraão Vicente, Ministru di Kultura, dizafia jornalistas pa purgunta kada kandidatu a Primeru-Ministru na prosimu ileison lijislativu di 18-04-2021 kal ki e se prujetu pa nos lingua maternu na prosimu Lijislatura.
Ministru di Kultura lansa es dizafiu duranti abertura di konferensia kumemorativu di Dia Mundial di Lingua Maternu i ki se Ministeriu organiza na dia 18-02-2021 la na Biblioteka Nasional. Tema di es konferensia foi: “Aprendizaji di lingua kabuverdianu i padronizason di skrita”.
Purgunta kada kandidatu a Primeru-Ministru kal ki e se prujetu pa nos lingua maternu, ta obriga-l sklarese se puzison pa ileitoris difensor di plenu ofisializason di nos lingua ten mas un ilimentu relevanti pa skolha di 18-04-2021. Konven lenbra ma un inkeritu di AFROSONDAGEM di 2005 konklui ma maioria di Kabuverdianus ta difendeba plenu ofisializason di lingua maternu kabuverdianu dja na kel altura. 15 anu dipos, Kabuverdianus sta mas sklaresidu sobri relevansia di ses lingua maternu pa ses liberdadi, dignidadi i identidadi, kuza ki sertamenti ta riforsa es maioria. Afinal, verdadi e sima azeiti...
Es dirijenti di MpD dexa es purgunta di ritorika: si pa nos diaspura frankofonu, ses lingua ofisial e franses i kabuverdianu; si pa nos diaspura anglofonu, ses lingua ofisial e ingles i kabuverdianu; si pa nos diaspura ispaniku, ses lingua ofisial e spanhol i kabuverdianu; nton, pamodi ki, pa nos li na Kabu Verdi, nos lingua ofisial ka pode ser purtuges i kabuverdianu, sendu lingua kabuverdianu universal pa nos Nason?
Ministru afirma ma, si ofisializason di lingua maternu kabuverdianu ta dipendeba apenas di Guvernu, nu al kababa es Lijislatura (ki dja sta na se fazi deraderu) ku lingua kabuverdianu ofisializadu.
Pabia ofisializason ta dipende di Asenbleia Nasional, Abraão Vicente, ki e sosiologu, ta sujeri pa trazedu pa dibati pa prosimu ileison lijislativu tematika di ofisializason di lingua kabuverdianu. Nes anbitu, es sosiologu ta dizafia jornalistas pa purgunta kada kandidatu a Primeru-Ministru na prosimu enbati pa ileison lijislativu kal ki e se prujetu pa lingua kabuverdianu.
Abraão, ki e skritor, ta difende ma lingua kabuverdianu e un prujetu nasional. Si nu ta papia di stradas, di skolas, di saudi, etc., pamodi ki nu ka ta papia tanbe di es grandi kiston nasional ki e lingua maternu kabuverdianu? – purgunta es skritor.
Ministru di Kultura afirma: “Ami, N ta kridita ma Konstituison dja ta poi lingua kabuverdianu komu un di kes lingua ofisial.” El ta justifika ma, ti ki Konstituison ta ordena Stadu pa faze tudu ki sta na se alkansi pa po lingua kabuverdianu en paridadi ku lingua purtuges, Konstituison sa ta rikunhese lingua kabuverdianu statutu di lingua ofisial.
Duranti konferensia ki N limia li di riba, Kuradora di Biblioteka Nasional, Mestri na linguistika Adelaide Monteiro, mostra-nu un monti di livrus na/sobri nos lingua pa, di sigida, difende ma dja ten kondisons pa nxina nos lingua.
Konferensia ki N limia li di riba, riuni (prizensialmenti i online) paladinus di ensinu di nos lingua maternu rizidenti li na Kabu Verdi i na diaspura (Merka, Purtugal i Fransa) pa nu partilha nos speriensias nun izersisiu riviguranti. N ta louva Ministeriu di Kultura pa es inisiativa!
Konfiri ditalhis di intervenson di Abraão Vicente, Ministru di Kultura, lisin: https://tinyurl. com/3evdm2f5