Maloma utsi nkwe ngentfutfuko
Make Jabulile Shabangu sewatise Ingwenyama Inkhosi Mswati Wesitsatfu kutsi baphatsi netisebenti teMaloma Mayini temukele umlayeto weSilo lotsi ‘Nkwe Ngentfutfuko’ ngekutitfoba, nangenjabulo.
Utsite konkhe labakwentako sebakwenta ngemandla lamasha, nenshisekelo lenkhulu kulandzela lenkhulumo yeNgwenyama leyayetfula ngesikhatsi ivula iPhalamende yaLonyaka ngalokusemtsetfweni.
“Tinhlitiyo tetfu tishaya tigi, titsi gi, gi, gi Mbangazitha ngalo phezukwemkhono lotsandza kuwumemetela mawuvula iPhalamende yalonyaka, lapho utsite khona sonkhe sive asisubatse ngesivinini lesikhulu, sakhe ematfuba emisebenti, intfutfuko nehlalakahle yeMaswati.” Kushito Make Shabangu.
“Lenhlabamkhosi levela eSigodlweni letsi ‘Nkwe Ngentfutfuko’ ivakele kahle Silo Sikhulu, futsi itfole bomasheshe ayinike lapha kitsi eMaloma Mayini. Sesivele sisetukwayo Lwandle Lolukhulu, siyayisebenta sibili. Lenhlabamkhosi letsi ‘Nkwe Ngentfutfuko’ ibitela sonkhe sive seMaswati, tinini teNkhosi nalabasekela live ngentfutfuko kutsi bahlanganise imicondvo, baphindze basebente ngekutikhandla kutsi live lilwe nebusweti, litfutfuke kute imphilo yeMaswati ichichime iye embili sibili.”
Batsite bawutfolile lomjovo wa ‘Nkwe Ngentfutfuko’ lapha eMaloma, base bengeta emandla netikhwepha kutsi lomkhakha wetemcebo waphansi bawundlondlobalise ngelizinga lelisetulu sibili, kute libe netitselo letengetiwe ekwenteni ncono imphilo yawo onkhe emaSwati.
“Sikwenta loko ngesibindzi nangekutichenya, ingani singumsinsi wekumila kulelive laka Ngwane, futsi siyinkampani yalapha ekhaya ngalokuphelele, ngekulawulwa ngumtali wetfu iNyatsi Group Holdings,” kushito Make Shabangu.
Imisebenti
“Sikhuluma nje Silo Sikhulu, inkampane yeMaloma Colliery Limited ivule imisebenti kulelive lapho bantfu labayinkhulungwane bavukela khona kuyewusebentela sinkhwa semindeni yabo. Emakhulu lasiphohlongo abo, bacashwe ngalokuphelele, kutsi labo labangemakhulu lamabili ngulabo labefika makunesidzingeko baphindze bahambe.”
Utsite sive lesinyenti, bantfwana, tihlobo nemango baphindze nabo batfole kuphila kuletimbasha letitfolwa ngulenkhulungwane yalabo labavukela lapha eMaloma Mayini.
Uchubeke watsi nabosomabhizinisi labatimele, labancane nalabakhulu lapha emangweni bayasitakala baphindze bandlondlobale ngekutsi lizinga lekukhicita kulendzawo selenyukile, bantfu sebanemali yekutsenga labakudzingako kanye nabobholotsi.
Make Shabangu utsite lenkampani iphindze ibe lihlahlandlela kutemabhizinisi Eswatini ngekuba sitiba lapho live litfola khona umnotfo netimali letinesisindvo lesikhulu letichamuka emaveni lasatfutfukile latsenga ngayo lomcebo wakulelive.
Intfutfuko
“Maloma Mayini uphindze asekele intfutfuko eveni ngeku bhadala tigidzi netigidzi teMalangeni letingu mtselo welive. Leyo mali ineligalelo lelikhulu sibili ekusiteni Hulumende we Mbube kutsi atfutfukise live aphindze entele emaSwati lokunyenti. Loku kufaka ekhatsi kwakhiwa kwe tikolo, tibhedlela, nemigwaco,” kusho Make Shabangu.
“Singu Maloma Mayini, siphindze sisebentise imishini yekukhicita lesezingeni lelisetulu ngetebuchwephesha. Loko kwenta kutsi kusebenta kwetfu kuyivikele imvelo, kube ngulokwetsembekile, lokungadlabhatisi timali, nalokukhonsile. Impela Silo Semhlaba, sifundza setemcebo waphansi lesicinile nalesindlondlobele siyinsika yentfutfuko yelive, ekwenteni emaSwati angesweli langatiphilisa ngako, atfole imisebenti lephilile, nelive liphindze libe netakhiwo letisembili.”