Sibonga imvula, emafutsa eNgwenyama
Bantfu baseLubonjeni naseShiselweni babonge bagangadza eNkhosini Mswati Wesitsatfu ngekuvakashela lendzawo yakuMaloma, batsi njengelisiko lemaSwati kuta kweNgwenyama kulendzawo kubusiswe ngemaZulu lehlise imvula lebesekadze bayigcina. Loku kuvakaliswe nguMake Jabulile Shabangu ngesikhatsi etfula inkhulumo yakhe emcimbini wekubusiswa kweMaloma Mayini.
“Silo Sikhulu siyawabona emafutsa eNgwenyama. Sive sakho nemfuyo yaso sesitawutfola imphilo. Besekukubi Ngwenyama lilanga lisishayile. Emasimini, tinkelebho kanye nematsafa besekamhlophe ngekweswela emanti. Sibonga kunyatsela kulendzawo Lwandle Lolukhulu lokusiletsele imvula nekuphila. Bayethe wena Waphakathi,” kushito Make Shabangu.
“Mbangazitha, likusasa lesifundza setemcebo waphansi lapha Eswatini lichakazile sibili. Lunwele loludze Lwandlo’khulu! Sonkhe lapha eveni singibo bofakazi bekutikhandla kwakho Silo Sikhulu, kutinikela ngephandle kwekufuna umvuzo, uphuma ungena emaveni eMhlaba ufuna budlelwane lobungatfutfukisa live lakho. Usenta njalo Silo, bewucaphele kutsi ucwayise emaSwati kutsi angafaki onkhe emacandza esilulwini sinye kodvwa atfukusele likusasa lapha nalapha.”
Bahlanyeli
Ushito kutsi kuwo wona lamalanga lawa lengcile Silo besehla senyuka eveni sinika bahlanyeli betimali kuleli dvolocina kutsi imisebenti yabo iphephile kuleli lakaNgwane.
“Uvule iminyango yemnotfo uvulela emaSwati ikakhulu kulesifundza setemcebo waphansi. Livi bewulihambisa embili wena Magwaza Ngempeniseli, kutsi umcebo waphansi welive kufanele kwentiwe siciniseko kutsi utfutfukisa live nawo onkhe emaSwati.”
“Tsine ke lapha eMaloma Mayini siwemukele ngetandla totimbili lomlayeto wakho Ngwenyama Ndvuna. Silosikhulu. Nyoni kayiphumuli ngoba ichwandzela bantfwana bayo. Bayethe. Mbangazitha. Sikunika dvolocina Mbangazitha kutsi sitawuchubeka sisebente na ‘Nkwe Ngentfutfuko’ kukusekela kulombono wakho lomuhle kangaka Silo. Uyawakhatsalela sibili emaSwati.”