Vakavinavinakataki na Veiqaravi
Oqo sa imatai ni veisiko nei Paraiminisita ki na koro.
Era vakavinavinakataka na veiqaravi ni matanitu na lewe ni koro o Natuva, e na tikina o Tai Vugalei e na yasana o Tailevu.
E a vakadewataka na nodra vakavinavinaka na lewe ni koro nai liuliu ni yavusa, o Ratu Apenisa Koroibuleka, vua na turaga na Paraimisita Voreqe Bainimarama, e na nodra veisiko yani vei ira e nai ka 10 ni Okosita. Na veiqaravi ni matanitu e tukuna o Ratu Apenisa ni sa drodrova na lomanikoro kara sa vakila na lewe ni koro. “Na veivuke e sega walega e Natuva; ia e sa drodrova talega na tikina o Tai Vugalei kei Viti raraba,” a tukuna o Ratu Apenisa.
E tukuna o Ratu Apenisa ni duidui na veiqaravi ni matanitu ka liutaka o Baininarama, ni sega kina na veivakaduiduitaki.
Ko ira na veimatanitu sa oti kei na kena veiliutaki, e tukuna o Ratu Apenisa, ni ra dau vukei ga ko ira na nodra dau ni veitokoni. Na nodra veisiko ki na koro ko Natuva na turaga na Paraiminisita, e sa qai matai ni veisiko kina koro vua e dua nai liuliu ni matanitu. E vu mai na veisiko oqo, e na veisureti malumalumu e a vakayacora na turaganikoro o Veresa Sorovakarua, e na kena la’ki dola na valeniwai e Vatukarasa e nai ka walu ni Okosia.
Sa dua na ka na nodra marau na lewe ni koro ka so sara mai na koro o Nameka era a tiko talega. Ko Nameka kei Natuva erau koro veiwekani. E dua ga na yavusa ka dua na kena iwase era sa la’ki vakatawa toka e Natuva. E koro liu tiko vei rau o Natuva. E vakaraitaka o Nina Cagilaba ka sa yabaki 51, kei Adi Litiana Bukabai, yabaki 60, mai Nameka ni rau marautaka na veisiko nei Bainmarama. Erau tukuna ni ra sa mai veisotari e matana votu kani levu ga na gauna e ra dau raica na kedra itaba e na niusivea.
Au sa vakauqeti kemuni moni vakayagataka vakavinaka na veivuke ni matanitu e sa soli mai me baleta na vuli. Voreqe Bainimarama Paraiminisita
Sikovi na koronivuli
Ni bera ni ra gole ki Natuva na turaga Paraiminsita era a sikova taumada na koronivuli, o Rokotuivatu District School. Na koronivuli oqo e vuli kina erua na koro, o Nameka kei Natuva ka ra lewe 54 na gonevuli. E va na qasenivuli ni kalasi dua kina walu. E a vakauqeti ira na gonevuli na turaga Paraiminisita mera vakayagataka vakavinaka na veivuke ni vuli ni matanitu. “Au sa vakauqeti kemuni moni vakayagataka vakavinaka na veivuke ni matanitu e sa soli mai me baleta na vuli,” e tukuna o Bainimarama. E vakaroti ira me ra na qarava vinaka na nodra vuli mera na rawa cakacaka ka ra na veivuke kina vei ira na nodra itubutubu. E nodra ivakasala kivei ira mera kakua ni kuitaki mai na nodra veitotogani ko ira na nodra i caba. Era a wawa na komiti ni koronivuli ka vakayacori na veikidavaki vakavanua vei ira, ka muria na nodra veivosaki. E vakarautaka o dau rai vuli Serupepeli Udre ni a solia nodra valenivolavola na turaga Paraiminisita e $19,000 me boro kina na valenivuli.
Era sa vakadeitaka e na bose ni na soli na nodra valenivolavola nai lavo me baleta na bai ni koronivuli.
Vakadonui me soveataki o Natuva
Sa vakadonuya na turaga na Paraiminista me sa na soveataki nai yalayala ni koro o Natuva. E vakadeitaka na Vunivola Tudei ni Tabacakacaka iTaukei o Naipote Katonitabua ni sa gole tiko e dua na timi ni sovea ni tabacakacaka me la’ki cakava na cakacaka ni sovea. Na cakacaka qo e tukuna ni na sega ni saumi.