Tudei o PM me Qarava na Cakacaka ni Wai Savasava me Gunuva na Lewenivanua
Eudolu na lewenivanua e Viti era sa marautaka tu e na gauna oqo, na veivuke levu esa vakayacora tiko na matanitu ki na na noda vanua.
E vakaraitaka na turaga na Paraiminisita o Voreqe Bainimarama e na nodra dolava na vakadrodroi ni wai e Natadradave, ni oqo na iyavu ni nona veiqaravi vaka Paraiminisita.
“Au sega ni kauwaitaka vakalevu na veivakacacani era vakayacora tiko eso na dau ni politiki. E sega talega ni’u kauwaitaki ira vakalevu na dau veivakaduiduitaki, vakabibi o ira era vakayagataka tiko nai vadi ca ni mata lotu se vakawa tamata mera veivakaduiduitaki kina,” e tukuna na turaga Paraiminisita
Mai na ivakatekivu ni nodra veiliutaki, e kaya o PM, era sa gadreva ga mera kauta mai na veivakatorocaketaki, baleta ni yavu tudei sara ga ni tiko bulabula ka tiko vinaka kina na lewenivanua.
Me vaka ni tiki bibi ni noda bula na gunuvi kei na vakayagataki ni wai savasava, era tukuna sa gadreva sara ga na matanitu me virikotori e na Yavu ni Vakavulewa.
“Oqo sa solia kina na dodonu vei kemuni na lewenivanua moni gunuva ka vakayagataka na wai savasava, ka sa cakacakataka tiko na matanitu me yacova na veivanua taucoko e Viti na veivakatorocaketaki oqo,” e kaya o PM. Na gunuvi kei na vakayagataki ni wai savasava, era tukuna e sega walega ni tiki ni veivakatorocaketaki, e yavu tudei sara ga ni tiko bulabula ka tiko vinaka na lewenivanua. Era tukuna talega ni veivuvale taucoko sa dodonu mera gunuva, ka vakayagataka tiko na wai savasava ka sega ni dodonu mera leqataka na wai mera vakayagataka e na veisiga.
Sa levu na gauna, era kaya, era sa dau voraki ka vakaocai vakalevu ga na marama, e na kena lai tawani ka dreketi mai na wai me caka kina na savasava kei na vakasaqa. “E vuqa na veitabana e na taudaku ni matanitu, era tutaka na kena vakasaqarai ka rawati na wai ni gunu vinaka ka savasava, me dua nai vurevure ni veivakayaloqaqataki ni rawa ka vei ira na marama, sai koya oqo e dua nai ulutaga e tutaka talega vakabibi na noqu matanitu.”
Na kena sa vakadrodrovi na wai e Natadradave, era tukuna, ni sa dua nai cavu-i-sausau vakaitamera e na loma ni koro kei na kena itikotiko, vakauasivi vei ira na marama e Natadradave.
“E sa na sucu ka susu mai na luveda e na kena sa vakarawarawataki na wai vinaka ka savasava.”
E na nodra ruku ni veiliutaki na turaga Paraiminsita, sa vakadrodroya rawa na matanitu kina 150,000 na vuvale na wai savasava. Era tinia na nodra vosa e na nodra kaya ni matanitu e sa na sasagataka vakaukauwa me vakadrodroi e na matavuvale taucoko e Viti na wai ni gunu savasava.