VALENIVOLAVOLA VOU E NATALACAGI

Era marautaka na lewe ni yasana vakaturaga o Naitasiri, ena kena sa vakarau tara e dua na nodra vale ni volavola vou ni nodra Matabose ni Yasana e Natalacagi, Vunidawa.

Oqo e tukuna na iliuliu ni matabose o Alivereti Nabulivou ni sa dua nai cavuikalawa levu ki na yasana. Na droini ni vale e tukuna o Nabulivou, ni ra sa vakadonuya na lewe ni matabose ka vaka kina o ira na veituraga bale e na loma ni yasana. Na vale e na taba tolu ka vakayagataka na tabana ni Social Welfare na kena imatai, ka rua e na vakayagataka na yasana kei na kena i katolu, ko ira eso na minisitiri ni matanitu.

Ko ira na qase era dau gadreva vakalevu na nodratou veiqaravi na Social Welfare, ka oqo na vuna e tukuna o Nabulivou me ratou vakayagataka kina na imata ni taba vale na Social Welfare. Na Matabose ni Yasana, e tukuna o Nabulivou, ni sa qarava tiko eso na veivakatorocaketaki, ka vakayacori e na veikorokoro kei na tikina. Era sa marautaka vakalevu na lewenivanua, e tukuna o Nabulivou, ena kena tasova yani kivei ira na veivakatorocaketaki me tosocake kina na nodra bula e na veisiga.

Ni toso tiko na veivakatorocaketaki ni matanitu e na loma ni yasana, e tukuna o Nabulivou, ni ra vosa suruya tiko ga ko ira na lewe ni To ni Veisaqa. “E levu era vakalewa tu ga ka ra tukuna wavoki na ca ni veiqaravi.”

Oqo na nodra dodonu, ia sa kerei ira o Nabulivou me ra tukuna ga na tukutuku dina.

Maika Bolatiki