Kauwaitaki mai Mereke na vuli e Kadavu
Waqa na cina sola mai na Kadavu Provincial School.
Era kauwaitaka vakalevu na nodra vuli na gone e na rua na koronivuli ni sekeniri mai Kadavu, ko ira na lewe ni yanuyanu kara sa cakacaka ka vakaitikotiko mai Mereke.
E na veivosaki ni Siga Vou kei Etuate Toroca e na nona mai sikova na koronivuli e rua, e tukuna ni ra sa tauyavutaka nai soqosoqo ka yacana tiko na “Kadavu USA Project”.
Na koronivuli e rua e tukuna ni ko Kadavu Provincial School kei Richmond Secondary School. E tukuna ni vuna era sa tauyavutaka kina na kabani ka rejisita sara, me rawa kina ni vakau mai na ilavo kivei iratou na kena komiti e Viti. “Oqo na lawa ni vanua o Mereke, kevaka e sega ni rejisita na kabani, e na sega ni rawa na vakau ilavo mai me mai vakayagataki e na veivakatorocaketaki e Viti,” e tukuna o Toroca.
Eratou a gole mai ki na noda vanua o Toroca, na nona lewe ni vale o Varanisese Toroca kei Bulou Wa Colata, me ratou mai raica na kena sa vakayagataki tiko na icina sola e na koronivuli erua.
E na yabaki sa oti era a kumuni lavo mai Santa Rosa me vakalivalivataki kina na Kadavu Provincial School se Yavulu. Na ilavo era a kumuna rawa e na loma ga ni dua na siga, e tukuna o Toroca ni $124,331. E vakaraitaka o Toroca ka cavutu mai Nalotu, Yawe, ni rua na iwasewase ni cakacaka e vakayacori, na kena dodo na wa ni livaliva e na veivale e koronivuli kei na kena la’ki vakadaberi na sola.
E tukuna ni kabani na Automatic Renewable Energy e a vakaitavi e na vakadodo wa, ka qai vakaotia e dua na cauravou. Na vakadaberi ni sola e vakaitavi kina na kabani na CBS Solutions. E mai vakacavari na cakacaka mai Yavulu e na vula o Noveba e na yabaki sa oti, ka donuya sara tikoga na gauna ni nodra veitarogi na gone. Na qasenivuli liu e Yavulu o Litiana Romanu, e tukuna ni oqo e sa qai matai ni tuvatuva levu me caka ni oti na kena tauyavu na koronivuli. “Sa waqa rawa na livaliva e na 24 na auwa ni vakatautauvataki kei na tolu na auwa ni sa bera nai tuvatuva oqo,” e kaya o Litiana. E tukuna talega ni ra marau vakalevu na gonevuli kei ira na qasenivuli ena kena sa vakalivalivataki na koronivuli. Ko ira na gonevuli e tukuna ni ra sa vuli lesoni e na tolu na kaloko e na mataka lailai. E na vula ko Jiune e na yabaki oqo era sa baci kumuni lavo tale mai Santa Rosa, me baleta na kena vakalivalivataki o Richmond Secondary School. Era kumuna rawa e $172,033.
“E via rauta e $134,000 e vakayagataki e na sola mai Rijimodi,” e kaya o Toroca.
E na nona veisiko o Toroca kei na nona i lawalawa ki na koronivuli e rua, e vakasalataki ira na gonevuli mera vuli sara vakaukauwa ka vakayagataka vinaka na livaliva mera qarava kina na nodra cakacaka ni vuli. Na isema ni soqosoqo mai Mereke ki Viti o Peni Musunamasi, ka dau bulagoci iratou tiko yani e na toso ni cakacaka.
Sa mai oti vinaka na rua na veivakatorocaketaki oqo, ka tukuna o Toroca ni sa tiko tale na ituvatuva, ia e na qai macala ni sa oti na nodra veivosaki ni ratou na lesu ki Mereke. Na isoqosoqo oqo e sema tale tikoga kina na isoqosoqo vakamarama e Kadavu.