Masulaki na Veiliutaki nei Bainimarama
Marautaki na veiqaravi ni matanitu kei Bainimarama mai Naqia.
Evakaraitaka ki na Siga Vou na Turaga Na Vunivalu e Naqia, o Ratu Semi Turaga, ni vakarau na veidigidigi ni 2014, era a duavata na veimatalotu e na kena masulaki me digitaka na Kalou o koya me liutaki Viti.
“Sa mai rogo na masu ni a vakauqeti ira na Kalou na lewenivanua e Viti, mera digitaki Voreqe Bainimarama me veiliutaki me yacova tiko mai oqo,” e tukuna o Ratu Semi.
E tukuna talega o Ratu Semi na veiqaravi nei Bainimarama kei na nona matanitu e va-Kalou baleta ni sega kina na veivakaduiduitaki. “E qaravi ira vakatautauvata na lewenivanua ka sega vakadua ni dua e vakanadakui,” e kaya o Ratu Semi.
Na veivuke ni matanitu e tukuna ni sa tasova tu ga mai vakayauyau ka sega walega ki na vanua o Wainibuka, ki Viti raraba talega.
Oqo na imataqali veiliutaki e a gadreva sara tu mai vakadede na noda vanua, ia sa qai yaco tu oqo e na gauna nei Bainimarama. Na veiliutaki nei Bainimarama, e tukuna o Ratu Semi, e yavutaki e na dodonu kei na cakacaka savasava. Sa qai vakila na vanua, e tukuna o Ratu Semi, e dua na iliuliu ka rogoca na tagi yadua ni lewenivanua ka rawarawa na veitaratara kei koya. E na tubetube ka vakaitavi kina na Mata ni Tikina o Wailevu o Sikeli Kubu Isalaba, e vakayatuyatutaka kina na cecere ni veiqaravi nei Bainimarama kei na nona matanitu.
“Keimami sa matalau e na veivakatorocaketaki sa vakayacora tiko na matanitu, ka sega vakadua ni vakasega ki na nemami gagadre,” e tukuna e na vosa ni tubetube o Isalaba.
Na turaga-ni-koro e Naqia, o Seru Surusuru, e kaya ni totoka vakaoti na veiliutaki nei Bainimarama kei na veiqaravi ni nona matanitu. E tukuna talega ni ra sa tu ga ko ira era vakalewa tu na matanitu, ia ko ya na nodra dodonu.
Sa baci vakacagau tiko na vakavakarau kina veidigidigi e na yabaki oqo, ka tukuna o Surusuru ni ra sa tekivu vunau wavoki eso na isoqosoqo vakapolitiki. E tukuna o Ratu Semi ni vanua o Wainibuka, e sa tekivu masulaka tiko vua na Kalou me digitaki tale o Bainimarama me veiliutaki. Era vinakata mai Wainibuka me sa na digitaki tale o Bainimarama, ka me rawa ni tomana na veiliutaki vinaka sa vakayacora tiko e na gauna oqo.
E na vinaka sara, e tukuna o Ratu Semi, kevaka me tosoya cake tale na totoka ni veiqaravi vakamatanitu. E dua talega na ka e vakavinavinakata sara vakalevu o Surusuru, na veivuke e na vuli sa vakayacora tiko na matanitu.
Sa sega ni rawa ni dua na ulubale vei ira na itubutubu, ia sa dodonu ga mera solia na nodra veitokoni kivei ira na luvedra e na nodra qarava na nodra cakacaka vakavuli. E tukuna ni sa levu na tabana ni vuli e dolavi mera na kune cakacaka kina na gone.
Sa kerei o ira na lewenivanua e Naqia mera vakayagataka vakavinaka na veivuke ni vuli, ka vakatalega kina na nodra tokona na nodra valenivuli vou na muri vuli ka mai dolava na Vunivola Tudei ni Tabana ni Vakavure Cakacaka o Salaseini Daunabuna e nai a 15 ni Okosita e Naqia.
E vakailavotaka na koronivuli oqo nai tubutubu nei Jack Berry, o John kei Tina Berry, me vakananumi kina na luvedrau ka vakawati e Naqia, ka mai leqa ni oti na nona vakaukauwa yago mai Welesi e na yabaki sa oti.
Era vinakata mai Wainibuka me sa na digitaki tale o Bainimarama, ka me rawa ni tomana na veiliutaki vinaka sa vakayacora tiko e na gauna oqo. Ratu Semi Turaga Turaga na Vunivalu e Naqia