Vakadeitaki na kaci ni Kalou
Tabaki e 17 na italatala, 3 na Vada ni Turaga ena Lotu Wesele.
Ena siga Vukelulu, e nai ka 22 ni Okosita e nai ka tolu ni siga ni bose ni Koniferedi ni Lotu Wesele, era a tabaki kina e 17 na iTalatala kei na tolu na Vada ni Turaga, e na valenilotu levu na Seniteneri e Suva.
Eratou a tabaki e liu na tolu na Vada ni Turaga. Ni sa bera na nodratou tabaki e a vakaitavi taumada na Vunivola Levu ni lotu o nai talatala Ili Vunisuwai, e na nona soli iratou na Yada ni Turaga vua na Qase Levu se peresitedi ni lotu Wesele, o nai talatala Epineri Vakadewavosa.
E a tukuna o Talatala Vunisuwai: “Kemuni saka na Qase Levu, o iratou na Vada ni Turaga oqo eratou sa vakarautaki oti vakavuli e na tolu na yabaki ka vuli cakacaka e na vica na yabaki. Eratou sa vakacavara vinaka kece sara nai vakatagedegede e dodonu me yacova e dua, me qai rawa ni tabaki me Vada ni Turaga Yaco e na Lotu Wesele e Viti kei Rotuma.”
O iratou na tabaki o Kelera Uarua, Mere Finau kei Miriama Galo. E kuria o Vunivola Levu: “Keimami sa soli iratou yani oqo me ratou sa tabaki me Vada ni Turaga Yaco e na Lotu Wesele e Viti kei Rotuma.”
E a tarogi iratou na Qase Levu: “Ko dou sa yalataka ni ko dou na saga na duavata, kei na veisaututaki ni lotu ka dau vakarorogo kina kena lawa, ka yalodina kina na veitokani ni Vada ni Turaga?” Eratou sauma na Vada ni Turaga Yaco ka vaka: “Au sa yalataka ni’u na kitaka vaka kina.”
Ni oti oqo eratou a qai tekiduru sobu ka tabaki iratou yadua na Qase Levu, a Vunivola Levu, Bisovi mai Koniferedi o Kalifonia/ Nevada, Peresitedi ni Lotu mai Niusiladi, Peresitedi ni Lotu mai Ositerelia kei nai liulu ni Vada ni Turaga.
Ni oti na nodra tabaki, eratou sa qai tabaki na 17 na italatala – Apisalome Driadria, Manoa Ratubalavu, Apisalome Vuadreu, Apaitia Seru, Aisake Volaunisiga, Ifereimi Tubuna, Jona Sevakasiga, Joseph Prashil Swammy, Kameli Koro, Semi Nasau, Livai Lawevuso, Tevita Veitarogi, Vasemaca Qarau, Apenisa Tawake, Akuila Samuela, Suliasi Bativou kei Waisale Waqanisau.