Veisiko ki Lutu, Naitasiri, na Turaga Paraiminisita
Na nona veisiko na PM ki na veikorokoro e sega ni oka kina na veitalanoa vakapolitiki.
Era na veisiko tiko ki na na koro vakaturaga o Lutu, e na yasana o Naitasiri, na turaga Paraiminisita o Voreqe Bainimarama edaidai.
Na veisiko oqo e kuri tikoga ni nodra veisiko wavoki ki na veikoro vaka Viti era sa tekivuna tiko mai. Na nodra veisiko oqo kina koro o Lutu, era sa vakavakarau na lewe ni koro, ka ra vakasalataki ira o talatala Josefa Sewale mera vakayagataka vinaka na nodra veisiko na iliuliu ni matanitu.
“Na taro vakalialia me kua,” e tukuna o nai talatala.
Na koro o Lutu, e nona koro o Solomone Naivalu, e dua na Minisita makawa ka lewena na isoqosoqo vakapolitiki na SODELPA. Na veisiko kina koro vakaturaga o Lutu, era na la’ki veitalanoa talega kei ira na lewenivanua.
Sa oti na nodra sikovi Vatukarasa, ka ra la’ki dolava kina na Vatukarasa Nursing Station, na koro o Natuva vata kei Natavea. Na veisiko oqo era gadreva mai na veikorokoro e na nodra via sota ka veitalanoa kei na turaga na Paraiminsita. Na nodra veisiko ki Natuva kei Natavea e a vakayacori ga na veisureti e na bati ni tanoa. E dua na ka e vakadeitaka tiko na turaga Paraiminisita ki na Siga
Vou, ni nodra ilakolako ni veisiko kina veikorokoro, e sega ni vakapolitiki.
“Au via dabe kei ira na lewe ni vanua ka rogoca mai vei ira na ka era vinakataka me vukei ira kina na matanitu,” e tukuna o PM. Era tukuna ni nodra ilakolako era wili kina na ivakailesilesi ni matanitu, ka ra dui lewena na isoqosoqo vakapolitiki era vinakata, ka sega gona ni na kilikili mera tukuna eso na ka vakapolitiki e na nodra veitalanoa kei ira a lewenivanua. Ni dua vei ira na lewenivanua e taroga e dua na taro vakapolitiki era tukuna vakadodonu na turaga Paraiminista ni sega ni kena soqo ko ya.
E na nodra veitalanoa kei ira na lewenivanua, era tiko talega na ivakailesilesi ni matanitu mera sauma na nodra vakatataro. Era marau na lewenivanua ni saumi vakadodonu na nodra taro ka sega tale ni qai waraki me kau cake kina tabana ni matanitu e vakadodonu kina na taro, me vaka na kena ivakarau e na veigauna e liu. Na turaga na Paraiminsita era marautaka vakalevu na nodra sota kei ira na lewenivanua, ka rogoca mai vei ira na leqa era sotava tiko. E levu era vakaraitaka walega vua na turaga Paraiminisita, na nodra vakavinavinaka ki na veiqaravi vinaka ni nodra matanitu, me vaka era sa vakamatatataka na turaga Paraiminisita, ni na biu laivi na politiki e na nodra veisiko tiko oqo. E na noa era a veisiko ki na koro o Nasauvakarua kei Nubutautau e na yasana vakaturaga o Navosa. Na veisiko oqo era a la’ki dabe ka ra veitalanoa kei ira na lewenivanua.
E na nodra bose na vei soqosoqo vakapolitiki e Butt Street e Suva e na macawa sa oti, ka wili kina na SODELPA, National Federation Party (NFP), Fiji Labour Party (FLP) kei na Unity Fiji, era tukuna ni veisiko ni turaga Paraiminsita, e sa vunau tiko kina vakapolitiki vei ira na lewenivanua.
Era a tiko e na veivosaki oqo o Mahendra Chaudhry mai na FLP, Laisenia Qarase mai na SODELPA, Sitiveni Rabuka mai na SODELPA, Seini Nabou mai na NFP kei Satish Kumar mai na Unity Fiji. Na veivosaki oqo eratou a saumi taro kina mai veira na lewenivanua ka vakadeditaki ni ratou na tauyavutaka e dua na matanitu cokovata, e a kena sagai me vakadrukai na matanitu ka veilutaki tiko e na gauna oqo na FijiFirst.