Tokona Na Lotu Na Nodra Vukei Na Suka Mai Vale Ni Veivesu
Sa solia na nona veitokoni na Lotu Wesele e na noda vanua na porokaramu ni nodra ciqomi lesu kina nodra veikoro, o ira sa vakasukai mai e na noda vale ni veivesu.
Na veitokoni oqo e a soli ni oti na nona vakamacalataka nai talatala ni Tabacakacaka ni Veivakadodonutaki (Fiji Corrections Service) o Talatala Joseva Tikonatabua, na porokaramu ka vakatokai tiko na “Community Action for the Rehabilitation of Ex-offenders” ka vakalekalekataki tiko e na va na matanivola na `CARE’. E vakaraitaka kina Siga Vou o Talatala Tikonatabua ni oqo e dua na porokaramu vou, ka sa tekivutaka tiko na Tabacakacaka ni Veivakadodonutaki e na noda vanua. Era digitaki mai ko ira e vinaka na nodra itovo e vale ni veivesu, ka ra qai lako curuma eso na vuli me vakavinakataki kina na taledi e tu vei ira.
Na vuli oqo e tukuna o Talatala Tikonatabua, e vakarautaki ira sa vakarau suka tiko kina nodra koro se nodra itikotiko, ka mera la’ki vakayagataka na veika era sa vulica yani mera bula kina.
E duidui na veika era vulica, eso era taleitaka na tetei, so na culacula, na kesakesa, na sivisivi, vavi madrai kei na so tale. Na Tabacakacaka ni Veivakadodonutaki, e sa gole tiko kina Bose ni Yasana kei na veikorokoro me la’ki vunautaka na porokaramu vou oqo, ka ra solia talega na nodra veitokoni.
Ko ira na sa suka lesu kina nodra koro, e vakaraitaka o Talatala Tikonatabua, mera ciqomi e na yalo marau kei na yalo savasava. “Mera vakila na nodra sa ciqomi lesu tale kina nodra itikotiko kei na koro,” e tukuna o Talatala Tikonatabua.
E tiki tale tikoga ni porokaramu oqo na nodra sikovi na curu tu mai vei ira na wekadra.
Sa so na lewe ni yasana era tiko e Suva, era sa veisiko yani kivei ira na nodra lewe ni yasana era curu tu. Na porokaramu oqo e tukuna o Talatala Tikonatabua, e vatabakidua sara ga kina nodratou veiqaravi e na loma ni vale ni veivesu, ia e na nodra sa na suka, sa solia yani na tavi levu oqo kivei ira na wekadra, ka na gadrevi kina na nodra veitokoni na turaga, na lewe ni vanua kei ira veimata soqosoqoso tale eso me vaka na Lotu Wesele. Na nona sa solia na nona veitokoni na Lotu Wesele kina porokaramu vou oqo, e tukuna o Talatala Tikonatabua ni sa marautaki sara vakalevu e na veiliutaki ni Tabacakacaka ni Veivakadodonutaki e na noda vanua.