Maninitaki na wai me toso ga na veiqaravi

Era sa maninitaka na wai ko ira na ivakalesilesi ni matanitu e Nabouwalu, Bua, me toso tikoga na nodra veiqaravi vei ira na lewenivanua.

Na Roko Tui Bua, o Aisake Sivo Namudu, e tukuna ni nodratou vale ni volavola na Tabacakacaka ni iTaukei kei na so tale esa vinakati mera sogo me baleta na leqa ni wai. Ia, era duavata na dau cakacaka me dola tikoga na vale ni volavola me ra qaravi tikoga na lewenivanua, ia me maninitaki na wai.

E vakaraitaka o Namudu ni sa tiko e dua na tani, ka sana vakatawani mera vakayagataka na dau cakacaka e Nabouwalu.

Na lauqa e tarai Viti tiko e na gauna oqo, e tukuna o Namudu, ni ra sa vakila na lewe ni yasana o Bua. “E dua na ka e vinaka kina ni ko ira na lewenivanua era sa kila tu na veika mera cakava, ka ra vakamuria vinaka tiko na ivakasala mai na Tabacakacaka ni Wai,” e tukuna o Namudu.

Eso na veivanua e Bua e tukuna o Namudu sa tekivu me kau wai kina na lori.

Mai na yasana o Nadroga/Navosa e vakaraitaka o Semi Kuru, na Roko Tui ni yasana, ni ra sa vakila talega na lauqa ni vanua. Era sa vakasalataki mera maninitaka na nodra vakayagataka na wai e na nodra veivale.

Sa yaco talega yani kina na nona vale ni volavola na nodratou ituatuva na Tabacakacaka ni Wai me baleta na kena vakaleleci na wai kina vanua era gadreva. Vei iratou na yasana o Ba, e vakaraitaka na Roko Tui o Jese Volau ni ra vakila talega na leqa ni wai. E vakaraitaka ni a tau na uca e na siga Vukelulu, ia e sega ni tau bi sara.

“Sa dua mada na ka na neimami marau ni sa qai bau tau na uca,” e tukuna o Volau.

Na wai e tukuna ni sa vakaleleci kina eso na yanuyanu era sa sotava tiko na leqa ni wai.

E vakaraitaka o Volau ni sega ni vakaleqa na cakacaka na leqa ni wai e Ba.

Sa koto oqori e ra ko ira mera qiriti kevaka e vinakati me kau yani kina na wai:

Talevoni sega ni saumi – 1507 Wasewase e Loma kei na Tokalu: Ilisoni Saladuadua - 9104 022 Dialanieta Dimaiverata - 9104 177 se o Ateca Bolakania - 9104 732 Wasewase vaka Ra: Romuluse Mataitoga - 9104 397 Jamie Darren - 9104 189 se o Fanny Levuilowa

- 9129 886

Wasewase na Vualiku: Apete Radrodrolagi - 9104 805 Miliana Vueti - 9161 710.

E sa baci kerekere tale yani e dua vei ra na manidia, o Sekove Uluinayau, me vakayagataki vakavuku na wai e na veimatavuvale.