Vakamuri na iVakasala Cala e na Saumi Rede
Evakaraitaka na iliuliu ni soqosoqo na Peoples Community Network (PCN) e na noda vanua, o Semiti Qalowasa, na nona kauwai e na nona sa curu na politiki me baleta na kena sa sega tu ni ra saumi na nodra rede e lewe 10 na vakaitikotiko e na veivale e Lagilagi, Samabula. Ko ira oqo era sega tu ni sauma na nodra rede mai na gauna era curuma kina na nodra vale vou. “Na rede e tiko ga mai na $40 ki na $50 na dola ena dua na macawa,” e tukuna Qalowasa.
E tukuna talega ni sa vinakati me saumi na rede, era sa qai gole ki na dua na isoqosoqo vakapolitiki me tarova na nodra vakagalalataki. Na isoqosoqo vakapolitiki oqo e tukuna o Qalowasa ni sega ni raica na dina ni veika e yaco tiko. Na PCN e tukuna o Qalowasa era sa veivosaki vinaka kei ira era tiko ena bareki, ni se bera ni ra vakacurumi ki na nodra veivale.
“Ia, era sauma vinaka tiko na kena vo, ka sega vei iratou na lewe tini.”
E vakaraitaka o Qalowasa ni ratou dau sikovi ka la’ki kerei mera sauma na nodra rede, ia e sega ga. Na kena soli na notisi e tukuna o Qalowasa ni sega ni vinakata na PCN, ia sa na cakava ena vuku ni nodratou vakadrecike.
“E levu era gadreva tu mera veisosomitaki ka ra tu vakarau mera saumi na rede, ia e mai tao tu ni ratou sega ni via vagalalataka na vale na lewe tini oqo.”
E tukuna o Qalowasa ni ratou sa wawa tiko mera gole yani me ra la’ki veivosakitaka na nodra na sauma vakacava na rede ia e sega ni dua e gole yani.
E dau kena ivakarau ni soli na notisi ka sega ni vakamuri e tiko tale e dua na gaunisala, ko ya me solia mai na mataveilewai na lewa mera sa vagalala.
E tukuna o Qalowasa ni oqo na iotioti ni gaunisala eratou na muria, ia e gadreva ga na PCN me muri na sala e malumu.