Tekivu na vakaleleci ni wai kina Yatu Malolo
Era sa vakila na leqa ni wai mai na Yatu Malolo ka sa solia na ivakaro na Talai Veivuke mai na Yasayasa Vakara o Joji Takala, me sa vakaleleci vei ira na wai. Na lauqa e sotova tiko na noda vanua era sa vakila vakalevu na veiyanuyanu ena mua i ra ni noda vanua.
E tolu na waqa a vakayagataki me vakalele wai; Ya na MV Subtizky, MV Vatulawa kei na MV Princess Moana. Ka kena isau vakailavo e $23,500.
Na wai, e tukuna o Takala ni vakaleleci ki na Mamanuca Primary School, Yanuya Health Centre, Yanuya Village, Malolo Primary School, Health Centre wili tale ga kina na High School. E vakaleleci e rauta ni 260,000 na lita na wai ki na veivanua oqo.,
E tukuna o Takala ni leqa tale tikoga na wai e na yanuyanu o Waya, Wayalevu, Naviti, Yaqeta, Nacula, Yawawa, Viwa kei Vatulele. E vakadeitaka o Takala ni sa tiko na ituvatuva e na kena vakaleleci na wai kivei ira era sotava tiko na leqa. Sa vakaleleci oti erauta ni 859,700 na lita na wai.
E namaki tiko me na vakaleleci e 1,595,000 na lita na wai kivei ira na sotava tiko na leqa. Na manidia ka qaravi ira na lewe ni vanua e na Tabacakacaka ni Wai o Sekove Uluinayau, sa solia na nona veivakadeitaki ni ratou na vakaleleca na wai kivei ira era na sotava tiko na leqa.
E na vula Okosita e tukuna ni sa vakaleleci oti e rauta ni 3.5 na milioni na lita wai ki vei ira era sotava tiko na leqa ni wai e na Wasewase e Loma, 22 na milioni na lita wai kina Wasewase Vakara kei na 14.5 na milioni na lita wai kina Vualiku ni noda vanua.
Era sa biu tale tu ga na tani ni wai e na veivanua era sotava tiko na leqa ni wai me vukei ira. Sa kerekere tikoga na Tabacakacaka ni Wai me maninitaki na vakayagataki ni wai, e na vuku ni lauqa e sotava tiko na noda vanua e na gauna oqo.