Me kakua na yalayala: Vunivalu Waima
Sa kacivaka na jemeni ni veidigidigi o Suresh Chandra ni sa na vakayacori na veidigidgi ni sa bera nai ka 22 ni Noveba e na yabaki oqo.
Na tiki ni siga ni veigidigi e na qai kacivaka na matanitu.
Ni sala vata tikoga e na kena sa kacivaki na veidigidigi, sa kerei ira na veimata isoqosoqo vakapolitiki e na noda vanua na turaga na Vunivalu Waima o Ratu Timoci Rokobukete, mera vunautaka ga na dina kivei ira na lewenivanua, ka me kua talega ni ra yalataka na ka era na cakava kevaka era sa na cicivaka na matanitu. Na tikina Waima e Naitasiri e wili kina o Nakorovatu, Vuisiga, Naqara kei na itikotiko vakamatanitu e Vunidawa.
E na vunau e na veidigidigi sa oti yani, e tukuna o Ratu Timoci ni ra dau la’ki yalataka eso na ka era na via cakava kevaka e sa na cicivaka na matanitu na nodra isoqosoqo vakapolitiki.
Eso vei ira na dau ni politiki oqo era sa via tu tiko e na yabaki oqo, ka sa kerei ira na Vunivalu Waima mera na tukuna na dina e na gauna ni nodra vunau.
Na matanitu na FijiFirst ka liutaka tiko na turaga Paraiminsita o Voreqe Bainimarama, e sega ni dua na yalayala eratou a cakava, ia era sa marautaka na lewenivanua e na veivakatorocaketaki, sa vakayacori tiko ki na nodra vanua ka vakatalega kina e na taudaku ni koro vakavavalagi.
E na tikina o Waima sa yacovi ira na gaunisala, na livaliva, na wai, tara na koronivuli kei na vale ni wai.
E vakaraitaka ni ra sa vukei talega na dau teitei.
Na veika era gadreva sa yacovi ira yani, ia ke dua tale na matanitu me veiliutaki ia me vakavinakataka na veika e sa rawata na matanitu na FijiFirst.
Na ka e vinaka kina na matanitu e veiliutaki tiko e na gauna oqo, e tukuna Ratu Timoci ni sega kina na veivakaduiduitaki e na veivakatorocaketaki e vakayacora. “E liu na veivakatorocaketaki e dau liu kivei ira na turaga kei ira na dau ni veitokoni,” e tukuna o Ratu Timoci.
Kivei ira na lewe ni tikina o Waima e tukuna o Ratu Timoci ni ra na vakayagataka na nodra dodonu ka virikotori e na Yavu ni Vakavulewa, mera digitaka o koya era vinakata mera lewena na Palimedi e na yabaki va sa tu e matada.