Me Volai Na Qele Ki Na Mataqali: Ratulevu
Edua na veilecalecavi sa mai basika e na kena taukeni e dua na tiki ni qele e Kaunikuila, Suva.
Na qele oqo e volai tu ki na yavusa Vatuwaqa ka wili kina e lima na mataqali – Vuanimocelolo, Nasau, Na Ceva, Boutaci kei Vatuwaqa. E vakaraitaka na nodratou gusu ni vosa na mataqali Vatuwaqa o Watisoni Ratulevu, ni tiki ni qele oqo eratou a vosa bubuluitaka na tuakadratou ni taukena na mataqali Vatuwaqa.
Na kena ivakadinadina e a vakarataki ki na Siga Vou ka tiko talega na ivola oqo vei iratou na Tabana ni Veitarogi Vanua kei na Tabacakacaka iTaukei. E vakaraitaka o Ratulevu ni leqa eratou sa mai sotava tiko na lewe ni mataqali ni volai tu na tiki ni qele oqo me nona na yavusa Vatuwaqa.
“Na neitou ibulubulu vakamataqali e tiko e na tiki ni qele oqo, ka iotioti ni veibulu keitou a vakayacora kina e na vula o Veverueri e na yabaki ga oqo,” e tukuna o Ratulevu.
E vakaraitaka o Ratulevu ni veibuli oqo e a tarova na Ovisa ia eratou a qarava ga ka sega tale na kena vakatataro.
Ko iratou na va na mataqali, e tukuna Ratulevu ni ra sa kila tu ni tiki ni qele e nodratou na mataqali Vatuwaqa.
Sa veivakasalataki kivei iratou o Solomone Nata mai na Tabacakacaka ni Qele Maroroi mera dabe na yavusa ka ra solia na nodra veivakadonui na mataqali e va me sa bokoci na vosa yavusa ka volai na vosa na mataqali me taukena na tiki ni qele ka sa mai veibataki tiko oqo.
Ni ra solia na nodra veivakadonui sa na volai na tikini qele oqo me taukena na mataqali Vatuwaqa.