Soli Na Qele Ena Kena Tokoni Na Matanitu
Erua na iliuliu ni mataqali ka rau soli qele me vakalevutaki kina na rara ni waqavuka e Nausori, erau tukuna kina Siga
Vou ni rau tokona na cakacaka levu e vakarau vakayacori oqo. O Silivakadua Naikawakawavesi na iliuliu ni mataqali Nukuloba mai Natogadravu eratou solia e rua na eka. E tukuna o Naikawakawavesi ni na levu sara na veika vinaka ena kauta mai na veivakatorocaketaki levu oqo. Na mataqali esa veivosaki tiko me baleta na veika e rawa ni caka me vaka ni na levu na veika ena muria mai na cakacaka levu oqo. O Semesa Rokoduguni, yabaki 83 mai na mataqali o Marakelevu, e tukuna eratou solia e lima na eka. “Na vuni neitou solia na qele baleta ni keitou tokona na cakacaka levu oqo keina matanitu,” e tukuna o Rokoduguni.
Na matanitu ka veiluitaki tiko ena gauna oqo e tukuna o Rokoduguni ni nona veiqaravi era sa vakila na lewe ni nona mataqali. E tukuna ni sa tiko e dua na iwase ni lavo esa maroroi tu me baleti ira na lewe ni mataqali era na muri mai.
Ena soqo ni vakasobu duru ena cakacaka levu oqo era vakatavi kina na turaga Paraiminsita o Voreqe Bainimarama.
Era tukuna ni vakasobu duru sa mai vakayacori ena sega walega ni veisautaka na irairai kei Luvuluvu, ena veisautaka talega na irairai taucoko kei Nausori. “Eda na sega ni taqea rawa na veika vinaka ena kauta mai na cakacaka oqo ena noda veitikotiko. Ni na qai vakacavari na rara ni waqavuka ena 2021 esa na tubu na isau ni qele ena vanua oqo ka sa na vakavurea na veibisinisi vovou kei na rawaka vakailavo e na tauini o Nausori,” era tukuna.
Era vakaraitaka ni gauna oqo sa levu sara vei ira na lewenivanua kei na kabani era sa malele mai ena veitiki ni qele e tiko wavolita na rara ni waqavuka.
Ena levu talega na cakacaka ena vakavurei ka sala muria mai na saravanua.
Era tukuna kivei ira na iTaukei ni qele mera sa tuvatuva ka vakamatau me rawa ni ra ceguva na gagadre ni lewenivanua era na gole yani ena nodra veimata ni katuba.