Na veiqaravi era vakaitavi kina na noda marama
Sa na tekivutaka na Siga Vou na italanoa me baleta na veiqaravi era vakaitavi kina marama. Ena draki ni veisau sa curuma mai na noda vanua, eda sa raica ni so na itovo e vou, ia eda kalougata na itaukei ni noda itovo vakavanua e dei tu vakavatu.
Ni dua na soqo ena yaco, era sa kila sara tu ga na turaga na nodra itavi ka vaka kina ko ira na marama. Na nodra itavi e salavata tiko kei na nodra itutu vakavanua ena nodra koro.
Ni ra vakawatitaki kina dua tale na vanua, era sa na la’ki qarava na itavi ena mataqali se itokatoka e vakawatitaki kina.
Kevaka e marama mai na vuvale turaga mai na nona koro, ka vakawatitaki kina dua tale na koro kina mataqali matanivanua, sa na la’ki qarava na itavi vakamatanivanua. Ia ni lesu kina nona koro, ena qarava ga na itavi mai vale levu.
Ia e tu ga na itavi era kilai kina ka veitalia sara na nodra biuta na nodra vanua. Ni ra na suka lesu mai kina na nona koro ena kila talega na itavi ena vakaitavitaki koya kina.
Sa qai koto na veicakacaka e sega ni rawa ni ra levea na marama me vaka vakasaqa, culacula, sasamaki, savasava, talitali, na samusamu, vakasucu gone vakarau kakana, me cavuti mada ga eso. Ena so na veivanua era dau la’ki dreke kakana mai na iteitei na marama.
Na rai kei na vakanananu e dau tu, ni sa vakawatitaki kina dua na vanua e dua na marama ena la’ki vakasucu me vakatubu kawa kina matavuvale ya.
Koya gona eda vakadinadinataka ni sega ni dua e rawa ni da veibataka na kedra bibi na marama. E vica na ivakarau vakavanua era dau vakaitavi kina na marama e wili kina na qalowaqa, na tabisa, na cere, na takitaki, na veisiko se na drekedreke, na tevutevu, na roqoroqo, na tikotiko, veilumu, ivakacoa, vakamiraseniwaitui.
Ena nodra itavi vakavanua na marama ena veiluitaki kina na Radinivanua, na watina na turaga. Ena dua na itukutuku me baleti ira na marama e vakarautaka o Naomi Koroisamanunu mai na Tabana ni Vosa kei na iTovo Vakaviti e tukuna kina ena dau liutaka na nodra cakacaka na yalewa lewe ni yavusa o koya na marama watina na turaga.
Nira takitaki, ena liutaki ira, ke ra tevutevu se dua tale na soqo era vakaitavi kina na yalewa, ena liutaka ga na ilakolako o Radinivanua, na nona marama na turaga. Ni caka e dua na meke vakavanua ena vakaitavi na Radinivanua, ena kilaitani ga o koya ena vuku ni vanua e tiko kina – oya ni na tu sara ga e loma me bola na meke.
Ena kilai tani talega o koya ena nona iukuuku. E masikuvui na nona isulu, ena rawa me tekina toka na lawe.
Nira sa dabe na lewe ni vuvale mera katalau, e sa na dabe sara tiko mai ra na marama radinivale, toka tikiva koya yani na luvena yalewa, me rau veiqaravi, rau qai dau iotioti duadua ni kana. Ni mataka ni sa na wilika kina na ivakamacala ni veiqaravi vakavanua era vakaitavi kina na marama.