Kua Ni Tukuni Na Itukutuku Lasu
Ena nona dolava na nodra vuli na Vukevuke ni Roko Tui mai Nadave na Vunivola Tudei ni Tabacakacaka i-Taukei o Naipote Katonitabua, e vakaroti ira mera na vakuwai ira ena kena vakadewataki na itukutuku lasu. “Sai kemuni na imatai ni vei taratara kei ira na lewe ni vanua ka ra dau tauri vakasala mai kina ena ulutaga cava ga e vei ganiti kei na nodra vakatataro.
“Sa bibi kina ena nomuni kilaka ka vakadewataka nai tukutuku e dina ka savasava ka vakuwai kemuni mai na itukutuku lasu,” e tukuna o Katonitabua.
Na matanitu e tukuna ni sa tu vakarau ka vakatudaliga ena veika era sota kaya ka sa tu vakarau talega, ena kena rogoci na domodra ka vaka uasivi o ira na lewe iViti. Sa balavu mai na kena veitalanoataki na veika me baleta noda yaubula.
E tukuna ni dodonu mera veitokoni ena kena maroroi, yadravi kei na vueti na veika bula e loma ni vanua, uciwai kei na wasawasa wili tale kina na noda veicakau.
E kuria ni sa tu na vakanuinui ni rawa ni ra vakatututaka e levu na porokaramu e loma ni nodra valenivolavola ena veisiga Vukelulu, ena kena samaki na baravi se uciwai volekata na nodra vei Valenivolavola ni Yasana. E vakavinavinakataka vakalevu na veitokoni tiko vei ratou na dau qarava ni vuli ni Sauvaki ni Vanua. “Esa rui bibi na qaravi ni vuli oqo baleta na veiliutaki e dua na tiki bibi ni veiqaravi ena noda vanua.” Na nodra tiko vinaka na lewenivanua, e kuria, e vakatautaki ena vinaka ni veiliutaki, ka sa rui bibi kina na vuli ni veiliutaki ena veigauna mai muri.
E tukuna ni sa nodra itavi mera veivakasalataki ena bibi ni nodra dau dabe wasoma na vuvale vanua, mera walia na nodra leqa me maroroi kina na vanua kei na veiliutaki vakavanua.
Na nodra veisemati vakavoleka kei na nodra Valenivolavola na iLiuliu ni Veitarogi Vanua, e tukuna ena veivuke sara vakalevu ena nodra vakasalataki ira vakadodonu na lewenivanua. E dua na yavu ni bibi ni nodra veiqaravi na Vukevuke ni Roko Tui sai koya na nodrai veisemati vakavunivola kei na dauniyau ena vei Bose ni Tikina.
Na bose ni tikina e kuria sai koya na matai ni katuba era sotava na lewenikoro, ena kena vakadewataki mai ni nodra kerekere, gagadre, kauwai kei na veika tale eso. “Ni sa na raica tiko na siro yani na veivakararamataki e na Bose ni Tikina ka sa gadrevi kina na nomuni vakasomuna na itukutuku matata e gadrevi ena noda veitikina vakaturaga.”
E dina ni tiko na turaganikoro, e tukuna o Katonitabua ni ko ira na ivakalesilesi ni yasana era na ciqoma na veika oqori.
Na itatau vei kemuni na Roko Veivuke e vakadewataka o Katonitabua, mera cakacaka vakagumatua ka ra vakasalataki na vei turaganikoro kei na mata ni tikina, ena nodra vakalewena ka vola na nodra revote ena veivula tolu.
“Sa na yaga moni kidava, ni veitukutuku oqo era na dau vakayagataka na veitabana ni matanitu, wili talega kina o ira mai na taudaku ni matanitu.”
E tataunaka vei ira mera kakua ni rawai vakarawarawa ena veivakatovolei eso kei na veitalanoa ni politiki, ka me ra na valuta na veivakatovolei oqori, ni sa inuinui ni nodra veiqaravi na nodra vakadeitaki ira ena dui tavi era sa vakacolati kina.